Smnewstl.com 25-08-2021 (Dili) — Diskonfia oknum forsa ida fasilita naok motorizada Beat Metan ida ho númeru xapa matríkula N-0902, hodi fa’an tutan ba sidadaun ida.
Motorizada refere detkta husi Diresaun Nacional Transporte Terestre bainhira sidadaun Antonio Paulo Sarmento, konsidera hanesan ema dahuluk ne’ebé lori ba halo inspesaun iha DNTT Balide Dili, iha dia 23 fulan Agostu foin lalais ne’e.
Ba jornalista Antonio Paulo Sarmento haktuir, motorizada ne’e nia sosa liu husi oknum forsa ida ne’ebé hanesan matadalan entre nia ho ida-ne’ebé fa’an motor refere.
“Sosa tuir kolega maun forsa ne’e dehan ninia kolega ne’e mak ha’u sosa motor ne’e dokumentu kompletu, STNK provizóriu iha hotu kartaun eleitorál motor na’in ne’e ninian, ida lori bá ne’e fó hatene ha’u dehan, ninia maun nian, maun forsa ne’e bá tiha servisu fatin mak kontaktu ninia kolega ne’e lori bá palpasu koko motor iha ne’ebá sosa duni iha ne’ebá,” dehan António Paulo Sarmento, iha Komandu Munisípiu Dili, kinta ohin.
Antónia hatutan, motorizada ne’e nia sosa ho folin $ 650, maibé lahatene motor ne’e naok mak fa’an bá nia.
“Lori mai DNTT mak deteta iha ne’ebá iha segunda dia 23, atu troka naran (balik nama) no foti STNK asli mak, sira kontaktu ha’u atu lori motor mai par ita haree númeru mesin lai, sira la fó hatene ha’u motor ne’e lakon ga ha’u la hatene, Diretór ho staff sira hadau tiha savi ha’u dehan, motor la’ós ha’u mak naok, tanba sosa tutan ne’ebé ha’u la lori halai ida”
Tanba ne’e, António Paulo Sarmento husu oknum forsa ne’e atu entrega fali nia osan dólar $ 650 ne’e.
Fatin hanesan, Na’in bá Motorizada, Martinho dos Reis informa, motorizada ne’e hafoin lakon, nia oan mane bá informa kedas parte DNTT atu blokeia númeru no identidade motor refere nian.
“Tanba oan mane bá fó hatene kansela tiha ona, sira atu loke sinál mean sai ona, entaun motor ne’e motor naok, ne’e mak telefone oan mane mai, ha’u mós horseik tun husi foho mai,” dehan Martinho dos Reis.
Nia dehan, pessoál naok motorizada ne’e sira lahatene ninia paraderu ona, tanba telefone la tama, maibé iha de’it mak oknum forsa ne’ebé matadalan.
“Ida fa’an motor naokten ne’e telefone númeru mate, ida sai matadalan ne’e mak agora ita buka hela, ne’e mós sira kolega ransu malu bee ne’e sei la lakon ida, tanba ne’e forsa ida,”
Oras dadauk, motorizada refere, PNTL Komandu Munisípiu Dili asegura ona hanesan evidénsia, nune’e kontinua halo investigasaun.
Maske informasaun ne’e fo sai, maibe parte Oknum ne’ebe diskumfia seidauk aprezenta a’an ba polisia hodi klarifika nia pozisaun.(ant)
Komentariu