SMnewstl.com BAUCAU ||11 Abril 2026-Sistema irigasaun modernu husi MAPPF fó esperansa foun ba komunidade Galata, Baucau, hafoin natar ne’ebé abandona durante tinan ha’at agora hahú moris fila fali. Dadaun, tos nain sira konsege ona reativa 82 hektare husi total 782 hektare área natar, hodi hahú fila fali produsaun hare no hametin seguransa ai-han ba komunidade.
Komunidade Galata, iha Suku Bahamori, Postu Administrativu Venilale, Munisípiu Baucau, agora hahú fila fali halo natar hafoin área ne’ebé abandona durante tinan ha’at hetan sistema irigasaun modernu husi Ministériu Agrikultura, Pekuária, Peskas no Floresta (MAPPF).
Xefe Aldeia Leabala, Antonio Moisés da Piedade, hato’o agradese ba IX Governu liu husi MAPPF tamba programa ida ne’e fó fila fali moris no esperansa ba komunidade tos nain sira iha Galata.
Antonio esplika katak durante tinan ha’at nia laran, komunidade sira la bele halo natar tanba sistema irigasaun manual la sufisiente no erozaun mos estraga rai no dalan bee.
“Durante tinan 4 nia laran ami nia natar la bele halo tamba irigasaun manual la to’o. Erozaun halo rai halai no bee la tama di’ak ba natar, entaun ami husik hela deit,” hatete Antonio.
Nia dehan, ho prezensa Governu no apoiu irigasaun modernu ida ne’e, komunidade hahú ona fila fali servisu iha to’os.
“Agora ami hahú ona halo natar. Maski seidauk hotu normal, maibé ami konsege ona kuda iha área 82 hektare. Total área natar iha Galata hamutuk 782 hektare, no maioria komunidade Leabala nian agora fila fali halo natar. Ami orgullu no agradese tebes ba MAPPF,” nia dehan.
Maski nune’e, Antonio subliña katak iha área balun sei enfrenta problema bee seidauk sufisiente ba hotu-hotu.
Hatan ba preokupasaun ida ne’e, Ministru MAPPF, Marcos Mameta da Cruz, esplika katak problema prinsipál la’ós falta bee, maibé falta komunikasaun no koordinasaun di’ak entre utilizadór sira
“Ha’u hanoin problema ida ne’e la’ós tanba bee la to’o. Bee iha ona, maibé tos nain sira presiza maneja no koordena malu di’ak liu tan atu distribui bee ho justo,” hatete Ministru.
Durante nia vizita ba Galata, Ministru mos rona diretamente agrikultór sira nia preokupasaun no buka solusaun atu hadi’a sistema irigasaun iha tempu oin mai, atu área natar hotu bele reativa fali no aumenta produsaun nasional.
Programa ida ne’e konsidera hanesan pasu importante ida atu hametin seguransa ai-han no hasa’e produtividade agrikultura iha Munisípiu Baucau. (/SMnews)
Komentariu