Smnewstl.com 02-12-2021 (Dili) – Prezidente Konsellu Imprensa (KI), Virgílio Guterres ‘Lamukan’ hamutuk órgaun komunikasaun sosiál sira, manifesta sentidu solidariedade bá Grupu Arte Moris, tanba governu obrigatóriu hasai sira husi fatin ne’ebé sira okupa kuaze tinan 20 nia laran.
Prezidente Konsellu Imprensa hateten, depois de Timor-Leste restaura ninia independénsia durante tinan 20 nia laran, iha loron 1 fulan Dezembru (Kuarta-Feira) horseik, sai nu’udar loron lutu nasionál bá Timor-Leste, bainhira haree imajen Arte Moris ne’ebé Materiál arte sira abandonadu iha li’ur, tanba governu obriga Grupu Arte Moris atu hamamuk fatin ne’e.
Virgílio esplika, sentidu husi arte refleta bá espresaun moris povu nian, maibé, ho asaun governu bá Arte Moris, maka sei hakoi povu nia klamar.
“Ha’u dehan lutu nasionál tanba, bainhira haree imajen sira-ne’ebé horseik iha Arte Moris, ita sente hanesan ita hakoi ita-nia klamar rasik, Arte espresaun moris povu ida-ne’e nian, sé Ita hakoi sé Ita halo rahun, ita halo rahun povu ida-ne’e nia klamar, povu ida-ne’e nia sentidu moris, tanba ne’e mak ita espressa ita-nia solidariedade,” dehan Prezidente KI, Virgílio Guterres ‘Lamuka’ iha diskursu, iha serimónia Dili Dialogue Forum 2021, iha salaun Delta Nova, kinta ne’e.
Karik la’o tuir istória loloos no tuir planu líder sira iha tinan 1975, Proklamasaun Independénsia Unilaterál Timor-Leste ne’e akontese iha dia 1 Dezembru, maibé la konsege, tanba Indonézia okupa iha Atabae iha 28 Novembru 1975.
“Ita fó ita-nia solidariedade bá ita-nia kolega artista sira ne’ebé halibur aan iha Grupu Arte Moris, dia 1 de Dezembru karik istória la la’o tuir planu Ramos-Horta ho nia kolega iha jerasaun 1975, 1 de Dezembru sei sai proklamasaun independénsia loloos, maibé ikus mai tanba inimigu to’o tiha ona Atabae, ikus mai adianta bá iha 28 (Novembru),” haktuir nia.
Alem de ne’e, Prezidente Konsellu Imprensa ne’e subliña tan, loron 1 fulan Dezembru, Komemora loron independénsia Papua Osidental nian.
Nune’e mós, loron 1 fulan Dezembru, nu’udar mós loron istória Portugál nian sai loron restaurasaun Portugál nian sai hanesan nasaun independente iha tinan 1460.(ant)
Komentariu