Smnewstl.com 26-09-2021 (Dili) –Tuir orario, Saudozu Antonio Joao Gomes da Costa ho kodiku ‘Ma’Huno sei lori ba tau iha Muzeum Rezistensia tuku sanulu dadersan, hodi sidadaun sira bele ba presta omenajen.
Razaun adia tuir informasaun ne’ebe SMNews asesu komfirma, tamba parte familia aprezenta mos difikuldade balun.
“Ohin lolos tuku sanulu dadersan lori mai nune’e membru governo hotu marka prezensa iha muzeum rezistensia, maibe tamba familia aprezenta difikuldade balun entaun deside adia fali ba tuku 6 lokoraik,”informa fontes komfirmadu balun iha Secretario Estado ba Asunto Kombatente Libertasaun Nacional.
Entretantu tuir informasaun ne’ebe SMNews asesu iha mate uma mos komfirma, mudansa ba oráriu tanba família matebian deside lori uluk saudozu António João Gomes da Costa ho kódiku ‘Ma’huno Bulerek Karathayano’, presta omenajen iha sede partidu CNRT Bairu dos Grilhos.
Ho nune’e bazeia ba konkordansia husi familia ho governo maka tuir planu Mate isin saudozu sei lori sai hosi nia rezidensia Pante Kelapa iha oras 15:00 ba presta homenajen iha sede Congresso Nasionál Reconstrução Timorense (CNRT) iha bairo dos Grilhos, Dili, hodi fó ondra ikus nu’udar fundador Partidu CNRT.
Husi Sede CNRT, sei kontinua lori ba tau iha Muzeum Rezistensia hodi bele fó tempu ba Orgaun Estadu sira Sosiadade Sivil, Korpu Diplomata no Sosiadade Timor oan sira bele ba presta omenajen.
Tuir ejenda ne’ebé maka media ne’e asesu, antes haloot mate isin saudozu iha loron Tersa-feira 28-09-2021, iha Jardin dos Herois Metinaro sei lori uluk ba horik fatin ka uma lisan WEBORORENRAHA Suku Lifaun, Bairru Uma Rentaun, Postu Administrativu Laleia, Munisipiu Manatutu.
Ba hatene Signifikadu Naran Revolusionariu Saudozu MA’HUNO, BULEREK, KARATAYANO
Naran rezitensia saudozu, MA’HUNO ho nia signifika naran funu, BULEREK foti hosi naran rate ida iha area Laleia no, KARATAYANO mós nu’udar naran ida sagradu tebes foti hosi rai ka fatin lulik (Hali-hun) ida iha Sepelata, Suku Bauro, Postu, Lospalos-Lautem.
Naran neé hahu bolu hosi aswain sira durante halo funu, tanba , fatin sagradu sai baze hodi subar no deskansa durante halo gerrilia.
Entretantu, saudozu António João Gomes da Costa ho kódiku ‘Ma’huno Bulerek Karathayano’, hakotu iis iha Ospitál Naisonál Guidu Valadares (HNGV), iha tuku 5 ho balun, tanba sofre moras komplikadu.
Saudozu mate ho idade (72) husik hela fen kaben atuál Deputada bankada CNRT, Maria Terezinha Viegas, ho oan ki’ak na’in 3 feto ida mane na’in 2.(ant)
Komentariu