Smnewstl.com – Xefe Estadu, José Ramos-Horta, liu husi unidade Servisu Sosiedade Sivíl no Asuntu Sosiál (SSSAS) Prezidénsia Repúblika, Segunda feira ne’e, hala’o vizita ba família vulneravel Paulo Gomes ne’ebé moris ho kondisaun difisiénsia durante tinan barak iha uma baraka ida, iha Suku Lação, postu administrativu Atsabe, munisipiu Ermera.
Objetivu iha vizita ne’e hanesan polítika Prezidente Repúblika nian ho espíritu pertense sosiàl, nune’e hatutan governu nia servisu atu reduz mal nutrisaun no pobreza iha rai laran.
Vizita ne’e hodi hatan ba pedidu husi autoridade lokál, Abrão da Conceição nu’udar xefe suku eleitu iha suku Lação ne’ebé akompaña no observa direta ba família ne’e nia moris, nune’e nia konvida Xefe Estadu liu husi unidade Servisu Sosiedade Sivíl no Asuntu Sosiál hodi bele haree direta.
“Ha’u hanesan xefe suku eleitu, antes ha’u sei komunidade babain prekupa tebes moris Família ida ne’e nian, tanba ha’u mós mai husi família ne’ebé simples no ha’u haree katak família ne’e vulneravel tebes no laiha ema ruma ne’ebé tau matan, hafoin ha’u kandidata-aan tau lós prioridade ba katuas ne’e ho nia família”, hateten Abrão da Conceição.
Xefe suku ne’e mós apresenta problema balun husi família vulneravel ne’e, tanba hela iha uma baraka no lakon dokumentu família nian nune’e difikulta sira atu bele halo registu iha notariadu, maibé autoridade ne’e fasilita no trata ona sira-nia dokumentu hotu atu bele hetan subsidiu ka apoiu ruma husi Governu.
Iha oportunidade ne’e, xefe suku husu mós apoiu ruma husi prezidénsia Repúblika atu bele halo uma mahon ida ba sira liu-liu tau matan mós ba oan nain neen (6) ne’ebé tinan barak lahetan asesu edukasaun ba sira-nia futuru. (*/Smnews)
Komentariu