Smnewstl.com 18-09-2021 (Dili) – Primeiru-Ministru (PM), Taur Matan Ruak, louva ho servisu profisionál saúde sira-nian liu-liu iha sala izolamentu ospitál Lahane, tanba halo esforsu makas hodi tau matan bá pasiente Covid-19 sira.
Iha sábdu ohin, Xefe Governu, akompañadu husi Ministra Saúde, Odete Maria Freitas Belo, hala’o vizita bá izolamentu iha Lahane, hodi haree besik kondisaun fasilidades iha fatin refere, inklui kondisaun saúde pasiente sira-nian.
PM Taur agradese bá esplikasaun tomak husi Doutora Célia ho ekipa, kona-ba difikuldades ne’ebé médiku sira iha izolamentu Lahane hasoru, liu-liu ligadu ho servisu atendimentu bá pasiente sira.
“Ha’u kontente haree ita-nia pasiente sira balun ohin komesa rekopera progressivamente, entaun ha’u hakarak agradese Dotora Célia ho nia ekipa tomak ne’ebé loron kalan lahatene kole, hader tau matan bá ita-nia família sira, ita-nia maun-alin sira, inan-aman sira-ne’ebé rajoens saúde liga bá Covid-19 sira mai iha ne’e. Kada ida ké sai fila-fali bá uma ne’e alegria boot ida bá ekipa ne’e, bá ita hotu bá timoroan tomak, tanba realmente sira-nia misaun mak salva vida,” dehan PM Taur, iha Lahane.
PM Taur hatutan, bainhira hetan moras, maromak ho médiku mak importante tebes, tanba médiku sira kalan ka loron la sente kole, tanba hakarak atu salva pasiente nia vida hodi aguenta moris.
“Entaun parseria ida-ne’e importante loos par hodi salva vida, tanba ne’e ha’u manifesta governu tomak nia solidariedade tomak, señora Ministra Saúde iha ne’e, ami-nia solidariedade tomak bá servisu Ministériu Saúde nian, liu-liu bá médiku sira no ekipa tomak ne’ebé servisu iha Lahane tau matan bá ita-nia pasiente sira,” dehan nia.
PM Taur sidadaun sira atu hakat bá sentru saúde hodi simu vasina, tanba ministériu saúde esforsu makas hela atu ema hotu bele simu vasina, nune’e bele iha imunidade forte hodi hasoru Covid-19.
Iha vizita ne’e mós, Primeiru-Ministru Taur Matan Ruak, preukupa kona-ba problema lojístika ne’ebé ospitál Lahane hasoru, liu-liu hanesan fatin so’e fo’er no seluk tan.
Tanba dala barak problema ki’ik sira mak perturba bele perturba fali servisu liu-liu hanesan líxu la hasai lalais, família sira laiha fatin atu hela no kuidadu boot iha entre asaun.
Maibé Cefe Governu garante, ezekutivu liu-liu Ministériu Saúde sei halo esforsu atu bele rezolve problema lojístiku refere, nune’e bele hakman liután servisu médiku sira-nian.
Entretantu, pasiente sira-ne’ebé dadauk ne’e halo tratamentu intensivu iha sala izolamentu Lahane hamutuk 16, mane 13, feto 3, pasiente hirak ne’e, kazu gráve 4, moderadu 11 no kazu leve 1.(ant)
Komentariu