Smnewstl.com 24-08-2021 (Dili) — Eis Primeiru-Ministru (PM) I no VII Governu konstitusionál, Marí Alkatiri, hamutuk ho família infetadu bá Covid-19.
Tuir informasaun ne’ebé Smnewstl asesu husi akun ofisiál Sekretáriu Jerál Partidu FRETILIN, Marí Alkatiri nian katak, eis Xefe Governu ne’e hamutuk ho nia kaben, oan no Bei-oan sira mós infetadu bá Covid-19.
“Hotu-hotu hatene iha loron hira liu ba hau dehan COVID 19 tama ona hau nia uma. No ha’u bei-oan rua maka infetadu, ha’u dehan, ha’u sei di’ak hela, iha tempu ne’ebá, agora hau atu dehan ba povu tomak katak, ha’u rasik infetadu ona, ha’u-nia espoza no oan feto mós infetadu, hau la moe atu hatete ba públiku realidade ida-ne’e,” deklara eis PM Marí Alkatiri iha akun facebook ne’ebé Smnewstl asesu Tersa ohin.
Líder nasionál ne’e dehan, nia sei fi’ar buat hotu-hotu sei la’o tuir ciência médika nia kapasidade atu mitiga, tanba ema ida-idak nia brani mai husi ida-idak nia fi’ar no hametin ho ciência nia kapasidae.
Ne’eduni hori uluk, sempre brani hasoru dezafios oi-oin, dezafius mai husi tasi mai husi foho, mai husi laloran ka rai okos, sempre hasoru maibé sempre manán bi’ar balu, barak tebes maka sakrifika sira-nia an rasik.
“Atu habadak ha’u-nia lian ha’u hakarak halo apelu bá maluk doben sira hotu, kamaradas ka adversárius, liu-liu ba ha’u-nia oan ka bei-oan doben sira iha Timor-Leste tomak atu kuidadu an ba. Favor hadok an husi COVID 19 agora ho variante Delta, hau mos hatene, ho hau nia esperiênsia rasik , atu hadok nusa deit ita nunka bele livre 100%,” tenik nia.
Entretantu, oras ne’e dadauk, eis Ministru Saúde, Sérgio Lobo, baixa hela iha sala izolamentu vera kruz no uza ventiladór, tanba infetadu bá Covid-19, inklui amu lulik ida.(ant)
Komentariu