Smnewstl.com 10-09-2021 (Dili) –Kondisaun Saude husi Mediku Senior, Sérgio Lobo ne’ebe infetado Covid-19 iha fulan kotuk no dadaun ne’e halao hela tratamentu intensivu iha Izolamentu Vera Vera Cruz, hahu rekoperado husi loron ba loron.
Ba SMNewstl via telefone, Eis Ministro Saude iha governasaun dalima ne’e informa, nia kondisaun hahu rekoperado, maibe sai preokupasaun ba nia tenki hadia lalais sistema atendimentu iha Hospital inklui mos sala izolamentu.
“Ha’u agora di’ak oituan ona, soke hamrik mak seidauk bele, iis sei badak oituan, mais kondisaun kompara ho horseik (Tersa-feira, 08-09-2021) di’ak liu, ne’ebé loron bá loron rekoperado oituan, fulan ida fulan rua tan,”dehan Lobo.
Eis Governante ne’e agradese ba entidades hotu nia apoio liliu orasaun nune’e maske iha situasaun krusial nia laran, maibe ho grasa nai maromak bele rekoperado maske seidauk masimu.
“Ha’u fó obrigadu de’it bá ema hotu-hotu ne’ebé apoiu ha’u to’o agora, husi orasaun. Maibé buat barak tenki hadia iha ospitál inklui hasae kapasidade husi enfermeiru sira nia, tamba se’e lae ita sei araska,” nia preokupa.
Nia fo ezemplu, durante iha ICU kuaze loron lima hanesan ne’e, maibe AC mate hela deit no laiha ema maka preokupa, ne’e ladun diak.
“Ha’u iha ICU kan loron 5 ida hanesan ne’e, durante loron 5 iha ICU, AC mate hela de’it, laiha ida mak preukupa atu tau AC, ne’e ladun diak,”nia haktuir
Aliende AC, sistema monitorizasaun pasiente liu husi CCTV mos sai preokupasaun. “Sistema monitorizasaun pasiente ne’e laiha, sira tau CCTV atu haree pasiente sira-ne’e, maibé CCTV ne’e ninia monitor televizaun ki’ik-oan ida tau liu iha leten ne’ebá ema haree la hetan ida,”Lobo tenik tan.
Nia rekuinese, buat sira-ne’e la’ós de’it fó ameasa la’e, maibé fo impaktu ba ema nia vida.
“Fó ameasa la’e, halo mate ema barak ona, ema barak mate ho Covid-19 nia laran ne’e, la’ós aimoruk mak laiha, buat ki’ik-oan sira hanesan ne’e mak halo,”Lobo Preokupa.
Antes hakotu, Lobo dehan, Covid-19 iha duni, maibe maneira atendimentu ne’e tenki hadia. “Covid-19 ne’e iha, ema hotu-hotu iha Covid-19, agora atendimentu bá Covid-19 ne’e mak laloos ida, halo ema hotu-hotu tauk atu bá ospitál, tanba orsida ba karik, sira Covid-19 hotu,”hatutan Lobo.(ant)
Komentariu