SEA Introdús Estratéjia 2 Halakon Totál Plástiku Iha TL, Insentiva Produsaun Saku Orgánika

Smnewstl.com 18-11-2021 (Dili) – Sekretáriu Estadu Ambiente (SEA) introdús ona estratéjia rua ne’ebé la hanesan atu bele halakon totál plástiku no embalajen ajuda bottol iha Timor-Leste, nune’e insentiva fali produsaun saku orgániku.

Sekretáriu Estadu Ambiente, Demétrio do Amaral de Carvalho hateten, implementasaun dekretu-lei kona-ba kombate no eliminasaun plástiku la’o hela ho estratéjia rua.

Estratéjia dahuluk, tuir nia mak face down, nune’e atu hamenus númeru plástiku no mós plástiku embalajen ka akua bottol, tanba Timor-Leste iha kapasidade atu halo resiklajen bá lixu sira-ne’e.

“Face down ne’e ita fokus bá embalajen de plástiku sira hanesan akua bottol sira ita halo limitasaun atu labele importa tan 600 mili litru mai karaik, maibé fó kondisoens ida-ne’e bá empreza nasionál sira bele prodús iha faze tranzisaun ida to’o tinan ida ga tinan resin bá oin, atu nune’e sira bele buka mekanízmu hodi substitui sistema embalajen ida-ne’ebé la amigu ho ambiente ho sistema embalajen ne’ebé mais amigu ho ambiente, resiklajen ho biodegradable,” informa Demétrio do Amaral, iha Palásiu Governu, kinta ne’e.

Ebkuanto, estratéjia daruak mak face out, ne’e intensaun hakarak atu kombate plástiku 100%, inklui bandu empreza sira atu loke produsaun plástiku iha Timor.

Maibé permite de’it bá produsaun suku orgániku ne’ebé nia sistema embalajen amigu di’ak ho ambiente

“Segundo ita bá mós estratéjia ida ita bolu face out ita hakarak kombate plástiku sira to’o zero 100%, ne’e mak task creesek ne’e, ne’e mak ohin ita bandu atu labele importa task creesek no mós labele loke fábrika kona-ba task creesek iha Timor-Leste. Ita halo insentiva mós bá indústria sira iha rai laran hodi prodús suku orgániku sira inklui produsaun boté ne’ebé inan feton sira prodús iha knua sira,” subliña governante ne’e.

Kona-ba plástiku ne’ebé kontinua naklekar iha tasi ibun sira, Demétrio do Amaral afirma, plástiku la’ós naklekar iha tasi Timor de’it, maibé sai kestaun iha nasaun tomak iha mundu.

Tan ne’e, plástiku ne’ebé kontinua naklekar iha tasi ibun sira bele mai husi nasaun produtór plástiku hanesan Xina no Indonézia inklui nasaun seluk tan.(ant)