Smnewstl.com (Dili) — Primeiru-Ministru (PM), Taur Matan Ruak, konvoka enkontru ho komisaun interministeriál koordenasaun bá implemetasaun medidas prevensaun no kontrolu surtu corona vírus 2019-nCov.
Prezidente komisaun interministeriál koordenasaun bá implemetasaun medidas prevensaun no kontrolu surtu Covid-19 atuál Vise Primeira-Ministra, Armanda Berta dos hateten, enkontru ne’e atu haree fila-fali medidas sira-ne’ebé implementa, nune’e oinsá atu normaliza fali situasaun.
“Ohin enkontru komisaun interministeriál hodi haree hamutuk ita seidauk iha desizaun ida, maibé iha aprezentasaun ida husi exelénsia (PM Taur) mak dirije ita sei haree fila-fali kona-ba medida sira-ne’e hotu oinsá par atu bele sai bá normalidade,” dehan Vise PM, Armanda Berta dos Santos, Tersa (10/08/21) iha Palásiu Governu.
Berta hatutan, enkontru ne’e mós atu reforsa liután kampaña vasinasaun iha timor laran tomak, tanba iha ona tárjetu bainhira persentajen vasinasaun to’o ona 70%, maka sei normaliza fali situasaun.
“Durante ne’e vasinasaun la’o hela implementa husi ministériu saúde iha territóriu laran tomak liu-liu kona-ba kampaña sosializasaun bá vasinasaun ne’e importante bá Timor-Leste par atu bele haree mós bá atinjimentu 70% par atu bele sai bá iha normalidade,” esplika nia.
Governante ne’e akresenta, governu mós sei reune fila-fali atu bele haree medidas estratéjiku sira-ne’ebé atu avansa bá normalidade.
Maibé, munisípiu Ermera kontinua aplika konfinamentu obrigatóriu, tanba númeru infetadu bá variante Delta sa’e ona bá na’in 12.(ant)
Komentariu