Smnewstl.com—Primeiru-Ministru (PM), Kay Rala Xanana Gusmão simu vizita hosi Ministra Estadu no Sub Sekretária Estadu Parlamentár Indo-Pasífiku, Reinu Unidu, Catherine West MP, ne’ebé re-afirma kompromisu sira atu kontinua fó apoiu bá Timor-Leste (TL).
Primeiu-Ministru sente onradu tanba simu Catherine West hodi ko’alia kona-bá apoiu tomak ne’ebé Reinu Unidu atu fó no fó ona bá TL.
“Tinan 1999 Catherine iha Austrália no apoia tebes ita-nia luta. Ne’e duni ita sente ondradu tebes ho nia vizita mai Timor,” PM Xanana haktuir iha Palásiu Governu, kinta (23/01/2025).
Xefe Governu hodi povu tomak nia naran agradese bá apoia tomak, tanba timoroan 30.000-resin mak servisu iha Reinu Unidu.
Agradesimentu ne’e tanba Timoroan hirak ne’e servisu iha Reinu Unidu ajuda tebes família sira iha Timor ne’ebé kada tinan haruka mai entre millaun $30 hodi halo uma no fó eskola oan sira.
Timor-Leste ho Reinu Unidu iha prinsípiu ne’ebé hanesan liu-liu promove pás, estabilidade, kooperasaun ho rai hotu-hotu inklui apoia TL iha prosesu adezaun bá ASEAN.
Iha fatin hanesan, Catherine West espresa sentimentu kontente tanba bele hasoru-malu ho Primeiru-Ministru, Kay Rala Xanana Gusmão iha vizita dahuluk ne’e.
Diskusaun ho Primeiru-Ministru útil tebes tanba ko’alia kona-bá mekanizmu sira atu hametin parseria iha área oioin inklui preparasaun Timor-Leste nian atu adere bá ASEAN no luta bá direitus umanus.
“Nasaun rua sai ona belun iha tempu naruk. Reinu Unidu sai ona uma bá Timoroan no kontinua apoia Timor-Leste hodi dezenvolve-an nu’udár nasaun prospéru,” nia hateten.
Durante enkontru Primeiru-Ministru akompaña hosi Ministru Negósiu Estranjeiru no Kooperasaun, Bendito dos Santos Freitas ho Embaixadór TL iha Reinu Unidu, João Paulo Rangel. (*/Smnews)
Komentariu