Smnewstl.com (Dili) — Jogadór estrajeiru husi Lalenok United FC Italo Pimental Soares, deside husik hela Lalenok United FC hodi muda ba klube Boavista FC de Timor, tanba hasoru problema saláriu maske nia rasik foin mak rekrutado iha fulan Janeiru liu bá.
Jogadór Italo Suares seidauk hala’o jogu ofisiál hamutuk ho Lalenok United FC iha tinan ne’e, tanba kompetisaun bá èpoka ne’e rasik foin mak atu hahú iha fulan agustu tinan 2021 ne’e.
“Ha’u muda tiha ona bá Boavista, no ha’u iha problema ho Lalenok, tanba kestaun saláriu. Ha’u hanesan atleta profisionál futebol. Ha’u-nia oan no famílias sira iha Brazil, sira-nia moris depende mai ha’u, entaun Lalenok la kumpri akórdu ne’ebé mak feitu ona, no ha’u solisita tiha ona bá FIFA no mós ba iha federasaun. Ha’u fiar katak, bele rezolve ho lalais,” informa Jogadór Brazileira, Italo Suares, bá SMnewstl.com sábdu (07/08/21) liu husi Instagram.
Nia mos husu ba parte Federasaun Futebol Timor Leste atu bele Solusiona problema ne’ebé nia hasoru.
Hau espera katak, federasaun bele hasai karta ida no fó sai ba públiku no mós esplika motivu saida mak ha’u sai husi Lalenok, ho nune’e adeptus sira husi Lalenok bele Hatene motivu saida mak ha’u sai husi klube,” hateten Suares.
Nia afirma, dadaun ne’e nia selebra ona kontratu ho Clube Boavista FC de Timor to’o époka ne’e remata, maibé, kontinua hein desizaun husi Federasaun Futebol Timor-Leste (FFTL).
Jogadór husi nasaun Brazil ne’e lakoi atu fó sai saláriu ne’ebé mak nia hetan husi klube Boavista de Timor bá públiku, tanba ne’e segredu.
Enkuantu Lalenok United rasik foin mak kontrata hikas Soares iha fulan-janeiru liu bá, hafoin iha Tinan 2019 sira deside hodi la prolonga nia kontratu wainhira Lalenok United atu hala’o jogu pra kualfikasaun AFC cup no mós jogu Copa FFTL no Taxa 12 iha tinan 2020.
Entretantu Jogador Brazileiru ne’e haforsa Lalenok United FC iha Tinan 2017 no ajuda klube ne’e promovidu husi segunda divizaun ba primeiru divizaun, no iha tinan 2018 lori lalenok United sai kampiaun iha Liga Futebol Amadora, Taxa 12 de novembru inklui mós Super Taxa.
To’o notísia ne’e fó sai, parte Lalenok United seidauk aprezenta pozisaun.(**)
Komentariu