Smnewstl.com-Dili, 5 Setembru 2025 —Hanoin situasaun ne’e sai viral iha media sosiál. Prezidente Ramos-Horta halo intervensaun urgente no orienta Ekipa Unidade Serbisu apoiu Sosiál Prezidénsia atu ba hare direta no fó ajuda asisténsia sosiál ba aman ho oan ne’ebé iha kondisaun defisiénsia fíziku-mental, iha suku Mulo, Postu Hato-Builico-Ainaro.
Armando Amaral de Deus (49) no nia oan feto Joselina de Deus (23) moris ho kondisaun defisiénsia kanek bo’ot iha kotuk laran tanba ahi mak han, kondisaun ne’e grave los laiha asistensia sosiál ruma.
Profisionál saúde Zelia da Silva de Jesus, kontratadu iha Postu Saude Mau-Chiga, konta kronologia bainhira nia hetan aman ho oan feto ho defisiénsia iha dalan.
“Iha oras 17:48, rai komesa nakukun, bainhira ha’u fila husi servisu fatin, iha dalan ha’u hasoru avo ho alin feto ida, ne’ebé avo dada hela nia oan nia liman. Kondisaun alin feto ne’e ha’u haree hanesan la seguru no ha’u mos sente aroma la diak husi situasaun sira. Ha’u para motor no husu informasaun, ha’u nia laran sente tristi tebes hare komdisaun ne’e”. Hateten Zelia da Silva iha nia mensajen bia Telefone.
Hafoin nia hato’o inisiativa atu tula avo ho nia oan ne’e ba nia uma hodi halo tratamentu medikal. Família defisíensia ne’e husu asisténsia sosial ba Ministériu Solidariedade Sosial no Inkluzaun (MSSI) no autoridade lokál, maibé seidauk responde ho atuasaun ruma.
Ohin dadérsan, tuir orientasaun husi Prezidente José Ramos-Horta, haruka Ekipa Prezidénsia Repúblika liu husi Unidade Serbisu Apoiu Sosiál (SSAS) hamutuk ho doutór espesialista nain rua husi Kuba, halo vizita direta kedas ba familia ne’e iha Ainaro. Ekipa médiku fó konsulta inisial no deside desloka ona família ne’e ba Hospital Nasionál Guido Valadares (HNGV), Dili, hodi hetan tratamentu mediku apropriadú.Remata//
(SMnews)
Komentariu