Smnewstl.com-ERMERA, 18 Marsu 2023- Prezidente Partidu Congreso Nacionál de Reconstrução de Timorense (CNRT), Kay Rala Xanana Gusmão husu ba Divizaun Klibur Profesional (KP-CNRT) Munisipiu Ermera atu servisu makas hodi fó vitória ba CNRT manan absoluta iha Eleisaun Parlamentar loron 21 Maiu 2023.
“Ita tenki esforsu aan duni, atu lori ita nia fileras ema barak liu ne’e di’ak liu, iha fatin barak ne’ebé ha’u konseege ba, ita haree katak, hosi partidu seluk komesa sente katak, iha tinan hirak ne’e buat ida la la’o,” dehan Xanana hafoin hamutuk ho Sekretáriu Jerál, Fransisco Kalbuadi Lay ho estrutura fó posse ba membru KP-Ermera na’in 50, iha salaun ETCI, Gleno Vila, sabadu (18/03/23).
Nia dehan, mezmu ohin loron membru partidu barak halo deklarasaun afilia ba CNRT, no CNRT agradese hodi husu nafatin ba ekipa hosi nasionál too munisipiu servisu makas nafatin.
“Iha afiliasaun ne’ebé maluk barak deklara tama mai CNRT, sira ko’alia
no temi problema sira ne’ebé sira hasoru, no lakon tiha konfiansa ba partidu ne’ebé sira partense ba, ida ne’e di’ak ba ita, tanba CNRT hetan konfiansa hosi ema seluk nia hanoin, nia haree no nia analiza hodi apoia ita, maibé ita mós tenki servisu makas,” nia apela.
Lider Istoriku ne’e hatutan, CNRT labele gava aan, tanba iha 2007 bainhira CNRT kaer governu, problema oin-oin mosu, no CNRT labele fó kulpa ba primeiru governu, tanba iha primeiru governu Timoroan hotu simu katak, TL seidauk iha esperensia no rekursu no finanseiru atu harii nasaun no estadu.
Eis Prezidente Republika ne’e hatutan, bainhira mosu krize 2006-2007 iha Timor-Leste konsege rezolve, bainhira kompara ho nasaun seluk mosu ditadura hodi halo sira nia estadu monu ba fragilidade ne’ebé halo povu terus ba bebeik.Nune’e bainhira halo komparasaun ba krize politika militar iha 2007, CNRT mosu hodi ajuda rezolve krize iha rai laran.
Iha fatin hanesan, Koordenador KP-CNRT Nasionál, Miguel Manetelo dehan, ekipa ne’e sei fortifika servisu KP nian atu servisu makas hodi lori vitória ba CNRT atu manan iha Ermera.
“Pose ida ne’e bele foritifika servisu KP -CNRT nian hodi prepara hasoru eleisaun mai bele hetan vitoria,” dehan Manetelu.
Nia hatutan, ekipa ne’e mós komesa deskute potensiál saida maka iha Ermera hodi bele hein bainhira CNRT manan bele realidade iha programa dezentralizasaun ne’ebé sei implementa hodi hadia dezenvolvimentu iha Ermera sai diak liután.
Membru KP-CRNT sira ne’ebé simu posse ho termu juramentu kompostu difiazaun Edukasaun, Saúde, Agrikultura, Infraestrutura, Dezenvolvimentu Rurál, Sosiál no Divizaun Administrativu Públika. (Smnews)
Komentariu