Smnewstl.com – Dili – Primeiru Ministru, Kay Rala Xanana Gusmão considera, postura polítika husi bankadas parlamentares iha Parlamentu Nasionál hodi aprova unanimante iha loron 19 fulan Juñu, programa governu nian ba tinan lima, hatudu mudança mentalidade no afirmasaun atu konsolida estadu direitu demokrátiku.
Pozisaun ne’e apresenta husi Xefe Governu iha Kinta-Feira ne’e, hafoin hasoru malu ho Prezidente Repúblika, José Ramos-Horta, hodi informa aprovasaun programa exekutivu nian iha Parlamentu Nasionál no mos lala’ok servisu exekutivu nian.
Ba oin, governu sei servisu intensivu liu tan, hodi haré deskrisaun servisu no ba kestaun orsamental hodi finansia programa husi loron 1 fulan Jullu to’o 31 fulan Dezembru.
“Ho programa ne’ebé aprovadu signifika baze legál ona, legál de’it seidauk to’o, agora mak servisu komesa hahú, informa ona ba Xefe Estadu katak iha semana sira mai ne’e, sei okupadu tebes tanba sei haree orgánika governu ninian, depois aprova tiha orgánika governu nian, hodi define se mak haree saida, halo saida hafoin ida ne’e mak kontinua ho reuniaun ba orsamentu retifikativu”
Tuir Kay Rala Xanana Gusmão, presiza defini medidas ba tinan hirak mai, hodi prevê finansiamentu tuir programa.
“Ita nia sistema temi dehan orsamentu bazea ba programa, se orsamentu bazea ba programa, iha tinan 2024 ita sei hasai programa asaun anual, no husi programa ne’e saida mak gasta, saida mak atu halo, no osan hira mak sei prevee no gasta iha 2024. Se ita iha projetu plurianual signifika governu tenke tau osan fazeadamente kada tinan hodi finansia atu atividade ne’e bele hotu iha periódu ne’ebé governu planeia,” Tenik Xefe Governu.
Ba oin, Primeiru Ministru promete atu atualiza kada semana, relatoriu servisu kona-ba exekusaun programa, alkansu, difikuldade no medidas ba oin, ba Prezidente Repúblika José Ramos-Horta no atualiza mos preparasaun ba Orsamentu Jerál Estadu tinan 2024.(smnews)
Komentariu