Smnewstl.com — Prezidente Repúblika no Laureadu nobél ba páz, J. Ramos-Horta, simu vizita ida husi Prezidente Banku Asiátiku ba Desenvolvimentu (ADB), Masato Kanda, ne’ebé nia Vizita dahuluk nian mai Timor-Leste. Enkontru ida-ne’e hala’o foin lalais iha Aeroportu Internasionál Nicolau Lobato, Dili, hafoin Xefe Estadu Remata nia partisipasaun Simeira CPLP nian iha Guiné Bisau.
Iha sorumutu ne’e, líder nain rua atualiza mos informasaun kona-ba projetu bo’ot atu haluan infraestrutura Aeroportu Internasionál Prezidente Nicolau Lobato. Projetu ne’e konsidera hanesan inisiativa estratéjika atu aumenta konektividade rejionál no moderniza setor transporte aéreu iha Timor-Leste.
Prezidente Ramos-Horta haktuir, “ADB hanesan parseiru importante ba Timor-Leste desde 1999. Sira nia prioridade mai ita mak hare liu ba infraestrutura, servisu di’ak no kualidade. Projetu bo’ot mak Aeroportu Internasionál Nicolau Lobato, ne’ebé parseria ho Japaun no Australia,” hateten Prezidente Repúblika.
Prezidente ADB Masato Kanda, konfirma katak banku prontu atu kontinua serbisu besik ho Timor-Leste iha implementasaun projetu sira iha futuru.
Nia mos apresia ba progresu Timor-Leste nia prosesu afiliasaun ba ASEAN no konfirma tan kompromisu Banku Asiátiku atu sustenta dezenvolvimentu inkluzivu no ba prosperidade ekonómia Timor-Leste nian.
Prezidente ADB ninia Vizita ne’e fo sinál forte kona-ba relasaun solídu no kooperasaun estratéjiku ne’ebé la’o hamutuk entre Timor-Leste no ADB iha área infraestrutura, integrasaun rejionál no kresimentu sustentável (*/Smnews)
Komentariu