Smnewstl.com (Dili) — Ministériu Ensinu Superiór, Siénsia no Kultura (MESSK), hakarak to’o tinan 2023, programa bolsa hakbiit atinji to’o rihun 3.
“Ita-nia meta bolsa hakbiit hakarak atinji to’o 2023 ne’e 3000, ida-ne’e iha 2021 ita hahú ho 910 katak, na’i liurai sira xefe suku sira-ne’e importante la halimar ita atu difine katak, loos duni ga la’e nia mai husi família kbiit laek,” dehan Ministru MESSK, Longuinhos dos Santos hafoin asina memorandu entendimentu ho MSSI iha Kaikoli, Dili. Kinta (19/08/2021)
Universidade Nasionál Timor Lorosa’e (UNTL) ho Institutu Politékniku Betano (IPB) mós aprezenta ona proposta ida atu kria komisaun akompañamentu, nune’e bele servisu hamutuk ho xefe suku sira hodi fó emisaun kona-ba deklarasaun husi suku nian.
“Depois iha mudansa balun ne’ebé iha mak ita kria komisaun akompañamentu, proposta ne’e mai husi UNTL no mós IPB tuir mai mak ita halo asinatura memorandu entendimentu ne’e ho Ministériu Administrasaun Estatal, nune’e haree liu bá rejime hakbiit liu-liu atu foti emisaun kona-ba deklarasaun na’i liurai sira ga na’i xefe suku sira iha munisípiu hotu-hotu,” esplika nia.
Governu mós sei servisu hamutuk ho asosiasaun difisiensia sira, nune’e bele identifika ema ho difisiensia hirak mak sei hetan oportunidade iha rejime espesiál bá ema ho difisiensia ne’e.
“Difisiente mós hanesan, liga mós bá asosiasaun difisiente sira ne’ebé mak atu identifika nia mós hetan oportunidade iha rejime espesiál ne’e bá difisiente sira, sempre ita iha diploma ministeriál atu difini katak, kuota ne’ebé mak ita ofrese ne’e depois ita sei halo,” tenik nia.
Konsellu jerál UNTL ho IPB sei define númeru totál estudante husi rejime espesiál no rejime oportunidade ne’ebé sei asesu bá instituisaun ensinu superiór públiku rua ne’e.
Maibé, bá ema ho difisiensia sira sei tama aula hamutuk ho ema normál sira, maibé MESSK planu sei fasilita ekipamentu balun bá ema ho difisiensia sira.(ant)
Komentariu