Smnewstl.com | DILI, 4 Abril 2026 – Tribunál kompetente sira deside ona ho forma definitivu katak rai iha Bebonuk, Postu Administrativu Dom Aleixo, pertense lejitimamente ba Mari Bim Amude Alkatiri, liu tiha prosesu legál ne’ebé dura liu dékada ida.
Maski nune’e, to’o ohin loron seidauk iha entrega voluntária hosi okupante sira, no prosesu ezekusaun judisiál sei la’o hela atu garante kumprimentu ba sentensa finál ne’ebé tranzitadu em julgado.
Iha komunikadu imprensa ne’ebé sai iha loron 4 Abril 2026, parte envolvida klarifika katak desizaun tribunál nian ne’e la bele kontesta liu hosi deklarasaun públika ka alegasaun mídia, tanba sentensa ne’e bazeia ba prosesu kompletu ho evidénsia no garantia legál tomak ba parte sira.
Komunikadu refere mos katak durante tinan sira ne’ebé liu, proprietáriu lejítimu, Mari Bim Amude Alkatiri, sempre respeita prosedimentu legál no hein desizaun tribunál ho konfiansa iha sistema judisiáriu.
Iha tempu hanesan, komunikadu ne’e alerta katak okupasaun propriedade kontra orden tribunál nian la fó direitu legál ba okupante, no falla atu kumpri sentensa bele konstitui violasaun lei no krime dezobediénsia.
Parte ne’e husu ba públiku atu respeita desizaun tribunál sira, tanba ida ne’e importante atu asegura orden jurídiku, pás sosiál no konfiança sidadaun sira iha instituisaun Estadu Direitu demokrátiku.(/SMnews)
Komentariu