Smnewstl.com (Dili) — Sekretáriu Estadu Assuntu Veteranus (SEAV), hahú aban Tersa dia 03 fulan-augustu tinan 2021, hahú halo ona verifikasaun bá dadus veteranus tinana 2009 nian.
Sekretáriu Estadu SEAV, Gil da Costa Monteiro ‘Oan Soru’ hateten, rejístu verifikasaun bá dadus veteranus ne’e sei hala’o husi Ministériu Assuntu Kombatentes Libertasaun Nasionál (MAKLN), SEAV no Konsellu Kombatentes Libertasaun Nasionál (KKLN) tuir kalendáriu durante loron 300 resin iha territóriu laran tomak.
“Prosesu verifikasaun ne’e iha loron hirak liu bá ami halo tiha ona anunsiu atividade loloos ne’e aban hala’o, maibé ha’u mós iha hela atividade atu araska dadauk ona bá foho, mais emprinsípiu iha kalendáriu jerál ministériu ninian ne’ebé em koordenasaun ho konsellu kombatentes libertasaun nasionál tuir kalendáriu jerál nia la’o aban,” dehan Sekretáriu Estadu, Gil da Costa, hafoin remata enkontru ho Xefe Governu iha rezidénsia Farol, Dili. Segunda (02/08/21).
Oras ne’e daduak, ekipa husi MAKLN, SEAV no KKLN prepara ona atu desloka bá munisípiu sira hodi halo rejistrasaun bá dadus veteranus 2009 nian.
Oan Soru hatutan, bainhira prosesu verifikasaun hotu, sei halo rekonfirmasaun fila-fali hodi hatene loloos no labele mosu kontestasaun kona-ba veteranus falsu.
“Ida-ne’e keta husu mai, orsida ha’u halo fali aisasik ne’e ga, verifikasaun hotu sei haree rekonfirma fila-fali, tanba ita labele haree verifikasaun ohin ne’e buat hotu-hotu loloos ona, se la’e mak ita tula ibun nafatin veteranus falsu, ita hotu-hotu falsu karik ukun-aan mós falsu hotu tiha hotu,” afirma nia.
Tuir kalendáriu jerál ne’ebé fó sai husi MAKLN atu halo rejistrasaun bá dadus veteranus hamutuk loron 300 iha territóriu laran tomak, maibé depende mós bá situasaun, tanba iha munisípiu Ermera aplika hela konfinamentu obrigatóriu.
“Emprinsípiu kalendáriu jerál ne’e ami tau iha ne’ebá loron 300 resin, maibé agora dadauk Ermera mosu tiha ona konfinamentu Railaku, ne’ebé depende ami bá hasoru situasaun ne’ebá dehan, o tenki ses husi ne’e, tanba o bá loos hasoru inimigu o mate,” subliña nia.
Rejistrasaun bá dadus veteranus tinan 2009 ne’e bá daruak nian, tanba tuir loloos, prosesu rejistrasaun tinan 2009 nian finaliza ona iha tinan 2019 ho 2020, maibé situasaun pandemia Covid-19 mak la permite, tanba dispensa tiha funsionáriu sira no labele halo servisu.(ant)
Komentariu