Smnewstl.com (Dili) — Governu liu husi reuniaun konsellu ministru, aprova projetu alterasaun dahuluk bá dekretu governu ne’ebé aprezenta husi Ministru Administrasaun Estatal (MAE), Miguel Perreira de Carvalho, kona-ba rejime remunerasaun kada fulan Prezidente Autoridade Munisípiu (PAM) simu saláriu vensimentu dólar $ 1.600 no Administradór Munisípiu (AM) sei simu $ 1.300.
Ministru Prezidénsia Konsellu Ministru, Fidélis Magalhães esplika, rajaun governu atribui saláriu vensimentu ho montante $ 1.600 bá PAM no $ 1.300 bá AM, nune’e bele kria kondisaun bá sira hodi ezerse sira-nia funsaun ho responsabilidade bá servisu sira-ne’ebé mak governu sentrál fó bá sidadaun lokál sira.
“Sé Ita hakarak atu dehan, dezenvolvimentu ne’e hahu husi baze, dalan ida mós mak atu hadi’a kondisoens sira-nian par sira bele iha kondisoens nível remuneratóriu ne’ebé di’ak par sira bele halo servisu di’ak liután iha munisípiu ida-idak, tanba ne’e mak ita prefere atu hadi’a kondisoens iha munisípiu no depois tun nível kraik liu, duké ita preukupa ho mellora kondisoens iha nasionál,” dehan Ministru Fidélis Magalhães, kuarta (04/08/21) iha Palásiu Governu.
Tanba ne’e Fidélis afirma, ho aprovasaun ne’e, kada fulan, Prezidente Autoridade Munisípiu sei simu sira-nia direitu dólar $ 1.600 no Administradór Munisípiu simu $ 1.300.
“Ho aprovasaun ida ohin, Prezidente Autoridade sei simu remunerasaun fula-fulan ho valór $ 1.600 dólar amerikanu, no Administradór Munisipál sira sei simu 1.300, ida-ne’e atu bele hadi’a kondisaun sira-nia, bainhira sira presta sira-nia knár bá ita-nia populasaun sira,”
Ho projetu dekretu governu ne’e, hahú husi fulan-janeiru tinan 2022, Prezidente Autoridade Munisípiu sei sei simu sira-nia remunerasaun fula-fulan ho valór dólar amerikanu $ 1.600 no Administradór Munisípiu sira sei simu dólar amerikanu $ 1.300.(ant)
Komentariu