Smnewstl.com-Primeiru-Ministru (PM), Kay Rala Xanana Gusmão hala’o vizita hodi haree direta no fó korajen bá vítima inundasaun iha Provínsia Bali, Indonézia.
Primeiru-Ministru hala’o vizita bá vítima sira ne’e iha ámbitu viajen servisu bá Reinu Unidu, segunda (15/09/2025).
Udan-bo‘ot ne’ebé akontese iha Bali hahú hosi Tersa kalan (9 Setembru 2025) to’o Kuarta dadeer (10 Setembru 2025), halo mota balun nakonu no sistema drenajen sira labele hasai bee rezultadu inundasaun maka’as hodi afeta bá sidade neen iha Bali.
Inundasaun ne’e estraga uma atus resin, merkadu tradisionál sira no estrada prinsipál sira, hodi halo edifísiu sira monu.
Ajénsia Nasionál Jestaun Dezastre (BNPB) fó sai katak, ema na’in 18 mate no rezidente atus resin maka sai hosi uma.
Tanba ne’e, Sorumutu Estraordináriu Konsellu Ministrus (KM) iha loron 12 fulan-setembru tinan 2025 iha Palásiu Governu Díli, Governu Timorense hato’o solidariedade bá povu, Governu Repúblika Indonézia no autoridade provínsia Bali nian, haree bá efeitu destruidór hosi inundasaun ne’ebé akontese iha illa ne’e.
Iha kontestu ida-ne’e aprova ona projetu Rezolusaun Governu nian, ne’ebé aprezenta hosi Primeiru-Ministru, Kay Rala Xanana Gusmão, ne’ebé autoriza doasaun dolar amerikanu millaun 2,5 bá provínsia Bali, ho intensaun atu apoia esforsu asisténsia umanitária no rekuperasaun populasaun sira ne’ebé afetadu. (SMnews)
Komentariu