Smnewstl.com 07-11-2021 (Maubisi) – Partido Congreso Nacional Reconstrusaun Timor (CNRT) liderado Kay Rala Xanana Gusmao kontinua hetan apoio husi sidadaun sira hodi prepara ba hasoru festa demokrasia Eleisaun Presidensial 2022 no Parlamentar 2023.
Ba periodo krusial 2022 no 2023, ne’ebe konsiderado hanesan determinante ba lideransa Kay Rala Xanana Gusmao ligado ho idade ne’ebe rezista avansa, populasaun aldeia 7 iha Posto Administrativo Maubisi, Municipio Ainaro deklara, lakoi atu husik oportunidade murak mean ne’e monu le’et nune’e deside sei deposita tomak komfiansa ba Partido ne’ebe eis Komando da Luta lidera hodi bele hadia povu no rai ne’e.
“Uluk iha tempu luta, rona deit mak naran ida Xanana Gusmao, maibe nia oin ne’e ita la hetan. Agora ne’e tamba deit ukun a’an nasaun mos demokrasia, ita ida-idak lao ninian ho partido la hanesan. Ba tinan ida ne’e, ami hakarak fila fali reafirma apoio ba Maun Bo’ot Xanana Gusmao laos hanesan ida agora, maibe nudar ida ne’ebe uluk lidera funu,”afirma Zacarias Bossan reprezentante kultura Brigada Soke Maubisi iha sesaun husu no hatan ho Kay Rala Xanana Gusmao
Zacarias rekuinese, durante ne’e nia votus la fo ba Partido CNRT, maibe hare ba governasaun ida agora ne’ebe konsiderado besik ona mandatu termina mas seidauk lori mudansa signifikativo ruma ba povu nia moris maka deside hakarak fila hamutuk ho Kay Rala Xanana Gusmao.
“Jujur deit Maun Bo’ot, tinan hirak ba kotuk, hau nia votus la fo ba ita bo’ot ida. Maibe ohin ita sama ain iha ami nia Suco Hohorai Ki’ik, ita la lori buat ida, hare deit ita bo’ot nia oin, ami sente hanesan lori esperansa foun ida mai ami. Tamba ne’e, ami deklara, sei fo apoio tomak ba ita hanesan Xanana ida uluk tempu rezistensia ne’ebe lori rai ne’e ba konkista nia independensia,”Zacarias hatutan
Nia dehan tan katak, momentu agora maka importante ba povu atu la fihir sala, se’e los maka bele kore povu ne’e hus isusar ho terus no ema ne’ebe bele halo ida ne’e maka Xanana Gusmao deit.
Aliende lia nain, Xefe Aldeia Kurema Suco Hohorai-Ki’ik reforsa katak, durante ne’e halerik ba Estrada no Eletresidade, maibe monu le’et deit.
“Ami hatene durante Maun Bo’ot ukun halo ona buat barak, maibe buat hirak ne’e dala ruma mos la to’o mai iha ami. Buat hirak ne’e mak hanesan estrada ne’ebe ita bo’ot ho kareta sama mai inklui eletresidade ne’ebe balun asesu ona no balun seidauk, maibe ho ita nia prezensa ami sei la duvidas. Sedu ou tarde sei to’o mai, laos hanesan seluk ne’ebe mai promete deit,”nia afirma
Rekuinese laos fasil, maibe lider komunitaria ne’e garante sei servisu maka’as hodi fo susesu partido CNRT ne’ebe Kay Rala Xanana Gusmao lidera atu manan iha Eleisaun Presidensial 2022 no Parlamentar 2023 hodi solusiona problemas sira ne’e hotu.
Aliende ne’e, inan feton desterado Atauro inklui faluk ho kiak mos aprezenta problema ne’ebe hanesan. Sira konsidera governo atual difirente ho governasaun Xanana Gusmao ne’ebe fo biban ba ema hotu hetan osan no livre halao nia moris.
“Uluk ita lao ba mai livre, maibe agora ne’e kuitado, lori deit folin sira ba Mercado mos araska hotu tamba tenki aprezenta kartaun ida ne’e no ida neba. Ida ne’e hamate tebes ami rayat sira, ne’ebe ho maun Xanana nia prezensa, ami fiar kuando nia kaer ukun sei rezolve problema sira ne’e,”hato’o Maria ho esperansa.
Iha nia biban, Kay Rala Xanana Gusmao rekuinese, seidauk tempu ba kampanha, maibe ageadese ba apoio no husu atu hot-hotu halao servisu hodi bele susesu ba saida mak sai hanesan hot-hotu nia hakarak.
Laos deit agradese ba apoio, maibe mos Xanana Gusmao ajuda introdus hela ba populasaun sira efeitu husi Korona Virus, ne’ebe sai kauza hodi difikulta komunidade sira labele lao sai.
Xanana Gusmao afirma, kovid-19 hanesan problema mundial, tamba ne’e laos katak, laiha, maibe iha duni. Soke preokupasaun ba atendimentu Kovid-19 ho ema nian mak la hanesan nune’e halo populasaun sira sai konfuzaun. Maske nune’e nafatin husu ba populasaun sira atu nafatin mantein protocolu saude mundial inklui kopera hofi vasina nune’e livre husi virus refere hanesan mos rai sira seluk.
Enkuanto Populasaun Aldeia 7 ne’ebe konsentra iha Suco Hohirai Ki’ik Posto Administrativo Maubisi, Municipio Ainaro hodi aprezenta pozisaun ne’e mak hanesan, Aldeia Hautsao, Gourema, Kartolu no Lauheli, Aldeia Riamori, Goula no Kanurema.
Aldeia 7 refere ha’at husi Suco Hohorai Ki’ik, enbkuanto tolu husi Suco Maubisi Vila. (Rio)
Komentariu