Smnewstl.com (Dili) — Primeiru-Ministru (PM), Taur Matan Ruak, simu ona konvite husi Prezidente Autoridade Rejiaun Administrativa Espesiál Oe-cusse Ambenu (RAEOA), Arsénio Paixão Bano, atu halo vizita servisu nian bá enklave Oe-cusse.
Prezidente autoridade RAEOA-ZEESM-TL, Arsénio Paixão Bano hateten, Xefe Governu simu ona konvite husi autoridade RAEOA, nune’e deside fulan-Setembru PM Taur sei vizita RAEOA.
“Ami husu atu Primeiru-Ministru vizita Oe-cusse ké nia aseita atu bá iha Setembru nian laran, entaun ami prepara bá ida-ne’e,” dehan Prezidente RAEOA, Arsénio Bano, hafoin remata enkontru ho Xefe Governu, Segunda (02/08/21) iha rezidénsia Farol, Dili.
Arsénio afirma, sira hakarak konvida PM Taur atu halo vizita servisu bá RAEOA, tanba saudades tebes Xefe Governu.
“Tanba Primeiru-Ministru Repúblika Demokrátika Timor-Leste bá Timor-Leste tomak, ami RAEOA rindu (saudades) tebes Primeiru-Ministru, i Primeiru-Ministru sempre gosta Oe-cusse gosta Timor-Leste, tanba ne’e mak nia hakarak bá,” hatete nia.
Iha vizita ne’e, Xefe Governu sei haree liu iha área edukasaun no mós kondisaun iha área rurál ne’ebé uluk nu’udar Prezidente Repúblika vizita ona.
“Primeiru-Ministru hateten, nia hakarak haree área edukasaun, nutrisaun, hakarak haree área rurál ne’ebé mak uluk nia vizita hanesan Prezidente Repúblika, entaun ha’u kontante tanba Primeiru-Ministru hakarak ami prepara Setembru nia bele bá vizita,” nia dehan tan.(ant)
Komentariu