Smnewstl. com – Ministra Edukasaun hala’o enkontru hamutuk ho parseiru dezenvolvimentu, dirizente nasionál no munisipál hodi ko’alia kona-ba asaun konjunta edukasaun iha Timor-Leste, iha Salaun João Paulo II Comoro.
“Asaun konjunta ne’e hanesan meiu ida hodi hato’o ba parseiru sira kona-ba planu Ministériu Edukasaun nia ba tinan 2024, depois oinsá mak sira bele identifika iha planu Ministériu Edukasaun nian no espresa katak prontu atu apoiu iha atividade ne’e mak trasa ona”, dehan Ministra Edukasaun.
Governante ne’e hatutan, Planu ne’ebé aprezentasaun mak nafatin apoiu ba Ministériu Edukasaun iha área rekursu umanu, área aprendizajen iha nível tolu hanesan ensinu pre-eskola, ensinu báziku, ensinu sekundáriu jerál no tékniku vokasionál inklui mós formasaun profesór/a sira infraestrutura nomós iha sistema sira atu bele reforsa liu tan ba hasa’e kualidade edukasaun iha Timor-Leste.
Iha fatin hanesan reprezentante País UNICEF iha Timor-Leste, Bilal Aurang Durrani hateten, kontente tebes hola parte iha enkontru daruak ACETL nian ba tinan 2023 hodi fó apoiu efetivu no koordenadu ba governu hodi alkansa rezultadu sertór edukasaun nasaun nian.
“Armonizasaun no aliñamentu ba asisténsia dezenvolvimentu ne’e importante tebes atu maximiza impaktu husi rekursu sira ne’ebé disponivel ba ita, nu’udar doadór apoiu ho planu setór prioridade sira governu nian”, dehan Bilal Aurang.
Reprezentante ne’e hatutan, agradese ba S.E Ministra Edukasaun Dulce de Jesus Soares no S.E Sekretáriu Estadu ESJETV Domingos Lopes Lemos ba sira nia lideransa kontinua hodi lori ba oin ajenda edukasaun nian no haree ba valór plataforma ACETL nian hodi harii parseira inkluziva sira kona-ba edukasaun iha Timor-Leste.(SMNews)
Komentariu