Smnewstl.com 01-09-2021 (Dili) — Iha reuniaun konsellu ministru Kuarta-Feira ohin, ne’ebé lidera husi Vise Primeiru-Ministru, José Maria dos Reis, deside hapara ona konfinamentu obrigatóriu iha munisípiu Ermera liu-liu iha postu administrativu Railaku ho Ermera.
Governu mós deside extende tan konfinamentu domisiliáriu jerál iha munisípiu Dili bá semana ida to’o loron 8 fulan Setembru tinan 2021.
Ministru Prezidénsia Konsellu Ministru, Fidélis Manuel Leite Magalhães hateten, deside ne’e konsellu ministru foti, hafoin rona tiha aprezentasaun husi Sala Situasaun Sentru Integradu Jestaun Krize (SIJK) kona-ba pontu situasaun iha Timor-Leste relasiona ho Covid-19.
“Hafoin rona aprezentasaun ne’ebé Sala Situasaun hato’o, konsellu ministru tetu no deside katak, Primeiru-Ministru, atu deside hodi extende tan konfinamentu domisiliáriu jerál ka konfinamentu obrigatóriu iha munisípiu Dili ho durasaun loron 7, konfinamentu obrigatóriu iha munisípiu Dili sei kontinua iha periódu 7 nia laran to’o dia 8 fulan Setembru,” dehan Ministru Fidélis Magalhães, hafoin remata enkontru iha ministériu finansas, kuarta ohin.
Maske konsellu ministru mós deside la extende ona konfinamentu obrigatóriu jerál iha postu administrativu Railaku no Ermera, maibé mantein nafatin serka sanitária iha munisípiu Ermera tomak to’o loron 13 fulan Setembru ne’e.
“Ohin konsellu ministru mós deside hakotu halo para ona konfinamentu obrigatóriu jerál iha munisípiu Ermera liu-liu iha postu administrativu Railaku no postu administrativu Ermera, ho nune’e, iha munisípiu Ermera sei vigór nafatin de’it mak serka sanitária iha munisípiu Ermera tomak sei kontinua to’o dia 13 fulan Setembru aprovadu tiha ona antes ne’e,” tenik nia.
Maske munisípiu Dili iha hela konfinamentu obrigatóriu, maibé permite mós bá sidadaun sira-ne’ebé mak hakarak atu halo resenseamentu eleitorál, maibé bainhira autoridade seguransa sira hapara iha dalan, tenki informa atu bá halo resenseamentu eleitorál, nune’e pessoál seguransa sira bele permite.
Nune’e mós, ema sira ne’ebé hela iha munisípiu Dili, inklui sira-ne’ebé mak vasina kontra Covid-19, atu kontinua hela iha uma, maibé bele sai de’it tanba rajaun saúde, funsionáriu ne’ebé autorizadu bá servisu, bá sosa nesessidade báziku no mós bá simu vasina.
Proibisaun hirak ne’e, la abranje bá ema hirak ne’ebé mak komprova ona vasinasaun kompleta (doze rua) kontra Covid-19, inklui labarik ki’ik sira ho idade tinan 6 mai-kraik ne’ebé akompaña ema sira-ne’e.(ant)
Komentariu