Smnewstl.com 25-08-2021 (Dili) — Hafoin halo análize bá aprezentasaun kona-ba pontu situasaun epidemiolójika nasionál husi Sala Situasaun Sentru Integradu Jestaun Krize (SIJK).
Governu aprova medida ezekusaun deklarasaun estadu emerjénsia ne’ebé efetua husi dekretu Prezidente Repúblika n°.69/2021, loron 24 fulan Agostu hodi hatán bá pandemia Covid-19.
Estadu emerjénsia bá dala-17 ne’e sei abranje bá territóriu nasionál tomak no vigora entre tuku 00;00 husi loron 31 fulan Agostu to’o tuku 23;59 fulan Setembru, loron 29 fulan Setembru 2021.
Hafoin aprova medida ne’e, Ministru Prezidénsia Konsellu Ministru, Fidélis Magalhães informa, ezekutivu mós aprova projetu rezolusaun governu ne’ebé impoin serka sanitáriu iha munisípiu Dili no Ermera to’o tuku 23;59 fulan Setembru.
“Konsellu ministru mós atu kontinua extende serka sanitária iha munisípiu Ermera ho munisípiu Dili, konfinamentu ne’ebé iha hela, hafoin dia 31 sei extende fali tan bá munisípiu Ermera no mós munisípiu Dili, konsellu ministru mós aprova kontinua konfinamentu domisiliáriu jerál bá populasaun postu administrativu Ermera no postu administrativu Railaku ho durasaun loron 7, ho nune’e sei kontinua to’o oras 11:59 loron 1 fulan setembru,” dehan Ministru Fidélis Magalhães, iha Palásiu Governu Kuarta ohin.
Nune’e mós, governu aprova impozisaun serka sanitáriu iha munisípiu Covalima ho munisípiu Baucau, ne’ebé sei hahú iha tuku 23;59 loron 26 fulan Agostu to’o loron 8 fulan Setembru tinan 2021.
“Konsellu Ministru mós deside impoin tan serka sanitária iha Covalima no munisípiu Baucau, serka sanitária iha munisípiu Covalima ho munisípiu Baucau ne’e, sei tama envigór orsida kalan oras 00;00, no sei kontinua to’o tuku 11:59 loron 8 fulan Setembru 2021 iha 14 dias,” subliña nia.
Governu mós mantein impozisaun iha suku Naimeko sub-rejiaun Pante makassar, no suku Bobometo sub-rejiaun Oesílo iha Rejiaun Administrativa Espesiál Oe-cusse Ambenu (RAEOA) to’o tuku 23;59 loron 8 fulan Setembru.
Nune’e mós konfinamentu obrigatóriu jerál iha suku Naimeko sub-rejiaun Pante makassar no suku Bobometo sub-rejiaun iha RAEOA.
“Konsellu ministru mós aprova extensaun serka sanitária bá suku Naimeko no suku Bobometo iha Oe-cusse, iha suku rua iha RAEOA ne’e sei tama envigór orsida kalan 00;00 no sei kontinua to’o dia 8 fulan Setembru oras 11;59 meia noite,” nia esplika.
Ho impozisaun serka sanitáriu iha REAOA munisípiu Ermera, Dili, Baucau no Covalima ne’e, bandu sirkulasaun ema nian iha área munisípiu ne’ebé refere ona iha sirkunskrisaun administrativa sira-seluk, á não ser que iha rajaun fundamentu seluk ne’ebé forte hanesan seguransa públika, saúde públika no seluk tan.(ant)
Komentariu