Smnewstl.com 10-01-2022 (DILI) – Liu husi plenaria Parlamento Nacional Segunda-feira ne’e, Deputada Nelia Menezes husi Bancada FRETILIN agradese ba Lider Nacional, Kay Rala Xanana Gusmao ne’ebe voluntariamente ho komunidade inklui timoroan balun mak iha kbi’it konsege normaliza Ponte Becusse Central ne’ebe kotu kauza husi udan bo’ot iha loron 3 Janeiro tinan ne’e.
“Ami agradese ba prezensa Lider Nasional, Kay Rala Xanana Gusmao neebe husik ona tempu, hodi tun ba baze, organiza kompania nune’e bele normaliza ona ponte Becuse Central hodi fasilita hikas movimentu transporte publiku li-liu iha Igreza Becusse nia kotuk,”hato’o Nelia iha sesaun Plenaria.
Reprezetante povu ne’e rekuinese, hanesan mos komunidade Becusse oan hato’o mos nia agradesimentu ba Kay Rala Xanana Gusmao inklui governo ne’ebe mos mobiliza ekipamentus IJE hodi normaliza Ponte ho Estrada iha Becusse kauza husi udan.
Nelia husu ba governu, liu liu Ministeriu Obras publiku atu toma atensaun ba ponte Becuse ka mota bee anin tanba volume bee husi mota bee anin boot tebes nune’e iha lori ameasas ba komunidade sira.
Aliende ne’e, Deputada Virgina Ana Belo husi Bancada CNRT refosra, ponte Becuse laos foin aat, maibe desde kedas tinan hirak nia laran no sempre bolu atensaun ba governo, maibe to’o oras rasik ne’e seidauk iha solusaun.
”Kada tinan governu promete atu hadia, maibe too agora laiha realidade, tanba nee ita la hatene osan nee iha ka lae, ou osan nee keta iha numeru deit karik, tanba problema Infraestrutura nee promete ba promete, la realiza too agora,”Kestiona Deputada CNRT ne’e.
Ba preokupasaun ne’e, Ministru Kordenador Asuntu Parlamentar no Komunikasaun Sosial (MAPCOMS), Francisco Jeronimo promete sei hatoo ba Ministeriu Obras Publiku nune’e bele konsidera. (Ant)
Komentariu