Smnewstl.com—Embaixadór Extraordináriu no Plenipotensiáriu bá Emiradus Árabes Unidus (EAU), Rui Manuel Hanjam hala’o despedida ho Primeiru-Ministru (PM), Kay Rala Xanana Gusmão no aprezenta asuntu kooperasaun ne’ebé sei estabelese ho EAU durante mandantu.
Asuntu ne’ebé Rui Hanjam aprezenta bá Primeiru-Ministru maka akordu pendente kona-bá Dupla Tributasaun ne’ebé Timor-Leste (TL) implementa ona ho nasaun Portugál no EAU mós hakarak atu implementa.
Alende ne’e, hato’o bá Primeiru-Ministru kona-bá Lei Investimentu ne’ebé presiza tebes atu Governu aselera prosesu, nune’e laiha dúvidas bainhira investidór sira hosi EAU hakarak mai halo investimentu iha TL.
“Dader ne’e atu arranka bá EAU, tanba ne’e maka ha’u mai halo despedida no rona orientasaun ruma hosi Primeiru-Ministru,” Rui Manuel Hanjam hateten hafoin despede Xefe Governu iha Palásiu Governu, sesta (31/01/2025).
Iha okaziaun ne’e Xefe Governu husu atu Embaixadór haree no buka kompriende kona-bá polítika rai laran, buka defende interese nasionál no akompaña mós kona-bá mudansa sira ne’ebé akontese iha nível globál.
Xanana Gusmão fó-hanoin atu haree fila-fali kona-bá antes ne’e delegasaun EAU hakarak apoia TL iha área saúde, liu-liu konstrui dormitóriu iha komunidade Canosiana, hodi halibur labarik feto rurál sira ne’ebé mai eskola iha Dili.
Ikus-liu Embaixadór hato’o agradesimentu bá konfiansa ne’ebé Prezidente Repúblika (PR), José Ramos-Horta, Primeiru-Ministru (PM), Kay Rala Xanana Gusmão, Ministru Negósiu Estranjeiru no Kooperasaun (MNEK), Bendito dos Santos Freitas no parte hotu-hotu fó ona konfiansa atu sai hanesan reprezentante foun Estadu TL iha EAU. (*/Smnews)
Komentariu