Smnewstl.com 11-11-2021 (Dili) – Governu Austrália liu husi programa PARTISIPA, fó apoiu osan hamutuk milliaun $ 4 dólar Austrália bá Bee Timor-Leste Empreza Públika (BTL,EP) atu uza bá halo reparasaun bá sistema bee-moos rua ne’ebé hetan estragus husi kalamidade públika iha dia 4 Abríl liu bá.
Kinta-feira ne’e, Ministru Obras Públikas, Salvador Pires asina akórdu ho Embaixadór Austrália iha Timor-Leste, Petter Roberts nune’e implementa programa manutensaun no reparasaun bá sistema bee-moos rua mak hanesan, Tohu Meta no Lakoto Mutudare ne’ebé hetan estragus iha kalamidade públika 4 Abríl foin lalais ne’e.
“Apoiu ne’ebé governu Austrália fornese bá governu Timor-Leste atraves de Ministériu Obras Públikas BTL,EP ho osan valór $ 4 milloens dólar Australianu ho objetivu atu ajuda BTL hadi’a sistema bee-moos ne’ebé hetan estragus iha kalamidade 4 de Abríl liu bá.
Sistema bee moos rua ne’ebé hetan sofre makas mak hanesan bee-moos Tohu Meta no ida fali mak Lakoto Mutudare,” informa Ministru MOP, Salvador Pires, iha Novu Turízmu, kinta ne’e.
Alem ne’e, Governu Austrália mós fó apoiu asisténsia téknika, inklui Enjiñeru husi Carno servisu hamutuk ho ekipa BTL,EP atu halo planu mitigasaun bá sistema bee-moos ne’ebé avaria, nune’e bele hadi’a hodi fornese bee-moos bá komunidade sira.
“Ohin ita asina akórdu asisténsia téknika atraves PARTISIPA sira-nia programa ida husi Embaixada Austrália ho Enjiñeru sira ajuda ekipa BTL halo planu mitigasaun ho osan no mós asisténsia téknika, espera katak, BTL bele halo reparasaun lalais nune’e ita bele fornese bee-moos bá ita-nia komunidade liu-liu ne’ebé mak halo ligasaun bá sistema bee-moos rua ne’e,” subliña Salvador.
Governante ne’e hatutan, Governu Austrália mak sai parseiru boot bá Timor-Leste iha área infrastrutura bázika liu husi MOP, tan ne’e, presiza espande tan programa PARTISIPA iha futuru.
Fatin hanesan, Embaixadór Austrália iha Timor-Leste, Petter Roberts hateten, durante inundasaun iha 4 Abríl liu bá, Governu Austrália liu husi Embaixada Austrália iha Timor-Leste servisu hamutuk ho BTL no MOP hodi fornese bee-moos bá vítima sira iha sentru evakuasaun.
“Ne’e importante atu responde bá inundasaun, maibé agora presiza foka bá reabilitasaun no mós preparasaun bá futuru, entaun ohin asina ona akórdu atu servisu hamutuk ho BTL atu reabilita no prepara liña bee-moos iha Dili, atu bele fornese bee-moos, akórdu ne’e ho montante dólar Australianu milliaun $ 4,” dehan Embaixadór Austrália, Petter Roberts.
Diplomata Austrália ne’e hatutan, Austrália liu husi programa PARTISIPA, hahú atu halo reabilitasaun bá sistema bee-moos ne’ebé estragus, maibé presiza prepara di’ak liután hasoru mudansa klimátika, nune’e bele proteje sistema bee-moos iha kapitál Dili.
Petter Roberts afirma, Austrália sei kontinua servisu hamutuk ho governu Timor-Leste, hodi tau matan bá sistema bee-moos, nune’e bele fornese bá komunidade sira.(ant)
Komentariu