Smnewstl.com (Dili) — Organizasaun rejionál ASEAN hasai ona estatutu Timor-Leste nian hanesan observadór, ligadu ho votu abstesaun Timor-Leste nian hodi fó apoiu bá rejime ditadura ne’ebé akontese iha nasaun Mianmar.
Vise Reitór Terseiru Assuntu Estudantil Universidade Dili (UNDIL), Hugo Lourenço hateten, estatutu observadór ne’e hanesan faze ida-ne’ebé Timor-Leste atu bele sai membru bá ASEAN, maibé ho desizaun ne’ebé foti bá kazu Mianmar ne’e, ASEAN hasai ona Timor-Leste nia estatutu nu’udar observadór.
“La’ós de’it sira rejeita ita-nia interese atu bá organizasaun rejionál ASEAN, agora dadauk ASEAN hasai tan tiha ita-nia estatutu hanesan observadór, ita atu hetan de’it estatutu observadór ne’e nu’udar faze ida ita atu sai membru, agora estatutu sira hasai ida-ne’e mak estraga tiha ita-nia pozisaun rejionál ida-ne’e,” dehan Vise Reitór UNDIL, Hugo Lourenço, iha nia servisu fatin kampus UNDIL, Dili. Sesta (06/08/21).
Nia haktuir, oras ne’e dadauk, nasaun hotu iha mundu luta bá demokrasia, maibé Timor-Leste vota a-favór fali bá rejime ditadura iha Mianmar.
“Tanba ne’e bá ita tenki-ser hatene katak, nasaun hotu-hotu hakarak moris iha ambiente ida demokrasia, mundu agora nia orientasaun ne’e bá iha demokrasia, agora ema luta bá demokrasia, ita pozisaun fó fali apoiu bá rejime ditadura, ida-ne’e mak halo konfiansa internasionál ne’e monu,” afirma nia.
Maibé Hugo dehan, tuir loloos, molok reprezentante Timor-Leste iha Nasoens Unidas atu foti desizaun, tenki konsulta ho líder nasionál sira, no mós diplomata señór sira, nune’e labele halo desizaun sala.
“Ida-ne’e sein konsulta ho ita-nia diplomata señór, tuir ita tenki konsulta antes halo desizoens ida-ne’e, ita-nia reprezentante mós ha’u hanoin la komprende ida-ne’e, lahatene polítika evolusaun ne’e la’o oinsá, nia halo buat ida forra husi ita-nia espetativa, serake Indonézia de’it vota a-favór bá kazu ne’ebé mak akontese iha Mianmar,” subliña nia.
Entretantu, foin lalais ne’e, reprezentante Timor-Leste iha Nasoens Unidas, vota abstensaun bá rezolusaun ONU nian ne’ebé kontra junta militár anti demokrasia iha Mianmar.(ant)
Komentariu