Smnewstl.com 30-08-2021 (Dili) — Organizasaun Jerasaun 12 de Novembru 1991, konvida maluk timoroan sira hotu, atu hamutuk festeza komemora loron konsulta populár 30 de Agostu 2021 bá dala-22 ho haksolok.
Iha tinan 22 liuba, (loron 30 Agostu 1999) povu Timor maioria hili opsaun referendu. Entre opsaun rua ne’ebé mak UNTAET (United Nations Transitional Administration in East Timor) fó ba povu Timor, maka referendum ho otonomia.
Nune’e, ho espíritu guerreiru, responsável, persistente, husi fiar metin no aten-barani husi bei’ala sira, funu-nain sira, no mós erói sira, feto no mane, maka to’o iha ohin loron, Timor-Leste atinji duni mehi bá ukun rasik aan.
“Ita iha responsabilidade boot ba ita-nia povu rasik no mós responsabilidade iha komunidade internasionál nia oin! Mai ita hotu hamutuk selebra loron ida ne’e, ho haksolok, hodi fó onra ba ita-nia pasadu no, husi ne’e, aprende hateke bá oin,” mensiona iha komunikadu imprensa ne’ebé Smnewstl asesu husi pájina ofisiál Jerasaun 12 de Novembru 1991, Segunda ohin.
Iha oportunidade ne’e, estrutura J-12Nov 1991 husu ba maluk timoroan hotu atu mantein kumpri regras, nune’e hakotu lalais korrente transmisaun pandemia COVID-19 iha Timor-Leste.(ant)
Komentariu