PNTL Díli Asegura Ona Jovens Ne’ebe Diskumfia Hadau Telefone Iha Díli Laran

Smnewstl.com – Hafoin simu orientasaun hosi Komandu Jeral PNTL, Xefi Servisu Informasaun Polisia (SIP) Nasional, halo kedas planu operasaun hodi buka tuir no identifika autor sira ba krime publiku hadau telfone ne’ebe mak sempre akontese iha Dili laran.

Iha planu operasaun ne’e ekipa konjunta envolve Aranha Leste, Aranha Oeste, Makikit Munisípiu Dili, Espada (UEP), Forsa Polisia (FP), Unidade Espesial Falintil (UEF), N2 (Naval-F-FDTL) junta ho SNI (Servisu Nasional Intelijensia), servisu loron tomak no konsege asegura joven mane nain-7 iha iha area ne’ebe lahanesan.

Tuir informasaun ne’ebe Smnews asesu husi página Relasaun Publiku Ministério Interior descobre, Iha operasaun ne’e ekipa konjunta asegura uluk suspeitu JM tinan 17, hela iha Area Bekae, Suku Lahane Osidental, Postu-Administrativu Nain-Feto. Iha prosesu identifikasaun suspeitu koopera diak hodi deklara katak sira hamutuk ho suspeitu seluk ho naran inisial hanesan PS, ID, AJ, TT, IV, CR, RM, OG, OG, RK, AB, EB, AF, IL inklui DdR alias A nudar autor prinsipal ba kazu hadau telfone iha area Delta no suspeitu sira ne’e inklina an iha grupu 3 ho naran RK (Rabat Kesi), RT (Rabat Tebe) no KKKM (Kaer Kona Kesi Metin).

Rona deklarasaun ne’e ekipa servisu fahe kedas grupu halo vizilansia total ba kada suspeitu sira nia uma no fatin konsentrasaun hodi lansa buska no kaptura tan autor sira seluk mak hanesan SMS, iha area Matadouro, Suku Vila-Verde, VBDG iha Suku Santa- Cruz, VBDG iha Audian, Suku Santa-Cruz, FCMX iha Mota Ulun, Suku Becora no-mos YGKS iha Mascarenhas hela iha Suku Lahane Osidental.

Hosi deklarasaun suspeitu hirak ne’e maioria refere ba DdR alias A nudar autor prinsipal mak lidera, nune’e ekipa servisu ba kedas buka tuir maibe suspeitu konsege halai ses hosi nia rezidensia iha area Tuana-Laran.

Ekipa kontinua servisu makas hodi dezenvolve kazu ne’e liu hosi fontes kredivel no identifika suspeitu nia subar fatin nune’e ekipa konsege asegura DdR iha area Ailok-Laran hamutuk ho evidensia motor ne’ebe durante ne’e sira uza hodi halo asaun krime.

Hafoin asegura suspeitu hirak ne’e ekipa konjunta entrega kedas suspeitu sira hamutuk ho evidensia ba Servisu Investigasaun Kriminal (SIK) Komandu PNTL Munisipiu Dili, hodi halo prosesu investigasaun no detein durante 72h tuir lei ne’ebe iha, antes submete ba tribunal hodi tuir porsesu julgamentu.