Smnewstl.com—Primeiru-Ministru (PM), Kay Rala Xanana Gusmão tun direta hodi kontinua loke provizoriu Ponte Kuluhun hodi fasilita movimentu trasnporte publiku labele mosu bebeik engarafamentu.
Iha oportunidade ne’e, Xefe Governu fó orientasaun bá empreza ho Tékniku sira hosi Ministériu Obras Públikas (MOP) atu sobu tán ponte Kuluhun parte sorin hodi halo kontrusaun foun, sábadu (26/07/2025).
Orientasaun atu sobu ponte tuan sorin ne’e hodi monta (cor) hikas atu kompleta ponte sorin ne’ebé monta (cor) ona iha fulan kotuk.
“Agora ita loke provizoriu ponte sorin para fasilita ona movimentu trasnporte publiku,ne’e sobu dadauk ona ponte sorin,” dehan PM Xanana
Provizoriamente movimentu públiku utiliza hela ponte foun sorin ne’ebé monta ona, hodi hein montajen bá ponte tuan ne’ebé sobu daudaun.
Tuir planu, Governu sei tau naran bá Ponte ne’e “Ponte 26 Agostu 1999” hodi hanoin Masakre ne’ebé akontese iha área Kuluhun iha tinan 1999.
Maski nune’e, seidauk iha desizaun finál atu hatuur loloos naran bá ponte ne’e tanba sei liu-hosi konsulta no diskusaun ho autoridade sira.
Iha terrenu, PM Xanana akompaña hosi Sekretáriu Estadu Asuntus Toponímia no Organizasaun Urbana (SEATOU), Germano Santa Brites Dias no tékniku sira hosi Ministériu Obras Públikas (MOP) kompostu hosi Enjeñeiru Tito Edgar F.N.D. Jesus atuál Xefe Planeamentu MOP, Koordenadór Laboratóriu Nasionál MOP, Joni Rodrigues ho Xefe Seksaun Kontrolu bá Xeias UIVP-MOP, Marcos Ximenes. ( */smnews)
Komentariu