PM Xanana Husu Funcionario Publiku Servisu ho Laran Hodi Defende Estado

Smnewstl.com – Primeiru-Ministru (PM), Kay Rala Xanana Gusmão husu bá funsionáriu públiku sira atu servisu ho laran no tenke iha partisipasaun ativa hodi defende Estadu ne’ebé sei iha hela prosesu konstrusaun nia laran.

Primeiru-Ministru transmite mensagem ne’e bainhira sai hanesan inspetór bá serimónia Isar Bandeira RDTL semana dahuluk fulan Jullu nian, iha Palásiu Governu, segunda (01/07/2024).

“Husu bá diretór hotu-hotu, funsionáriu públiku hotu-hotu, hosi leten to’o kraik ne’ebá mós, imi iha ne’ebá imi mak permanente no imi mak tenke defende liu Estadu ida-ne’e. Tenke partisipa ativu, partisipa servisu ho fuan tanba ita sei iha hela prosesu konstrusaun,” Xefe Governu husu.

Xanana Gusmão apela bá funsionáriu públiku hotu-hotu tenke hakas-an iha ida-idak nia seksaun, diresaun, ministériu, hotu-hotu halo reflesaun kona-bá saida mak halo ona durante tinan ida nia laran, durante tinan ida-ne’e hadi’a an ka la’e tanba funsionalizmu públiku la’ós oportunidade atu fó empregu.

Husu mós bá membru IX Governu Konstitusionál nian, bá instituisaun hotu-hotu tenke halo reflesaun kona-bá kompromisu ne’ebé hasai ona atu ko’alia, kurize no atu hametin Estadu ida-ne’e.

“Ne’e duni auditoria atu hahú, la’ós auditoria mai hosi organizasaun timoroan nian, maibé mai hosi internasionál tanba ita-nia sosiedade ne’e akustume ona hodi halo politizasaun bá buat hotu-hotu,” Xefe Governu ne’e informa tán.

IX Governu hahú daudaun pasu importante atu halo reforma iha seitór justisa, tanba ne’e Tribunál, Ministériu Públiku no defensór públiku sira hotu-hotu tenke hakaas an atu servisu ho responsabilidade bá rai no bá povu ida-ne’e.

Tuir Xefe Governu, Komisaun Funsaun Públika (KFP) servisu daudaun atu haree hodi halo reforma ida kona-bá buat hotu-hotu kona-bá funsionalizmu públiku.

Xanana Gusmão konsidera ida-ne’e hanoin kapás tebtebes no Konsellu Ministru (KM) sei diskute atu taka dalan bá buat ne’ebé la di’ak hanesan, maski la hatene buat ida maibé bolu-malu sa’e bá ne’ebá, hatene tiha muda bá fali ne’ebá tanba manán osan barak-liu.

Nune’e, nia husu bá funsionáriu públiku sira, tenke tau iha ulun no iha fuan katak, membru Governu bele muda kada tinan lima, maibé funsionáriu públiku mak hela permanente no tenke defende-liu Estadu.

Xanana Gusmão fó ezemplu katak, membru Governu ida bele sai hanesan treinadór kapás tebes karik, maibé bainhira funsionáriu sira mak hanesan jogadór no la hatene atu remata, la hatene joga buat ida, ne’e rezultadu sei lakon.

“Tanba ne’e imi tenke servisu ekipa, fó hatene bá malu ne’e importante la halimar iha imi-nia servisu fatin. Nu’udár funsionáriu, hosi diretór bá to’o kraik ne’ebá, ita hamutuk tenke assume misaun boot ida ne’e. Servi povu no rai ida-ne’e. Imi mak laiha, Governu la serve. Membru Governu maski mesak ema matenek de’it mak imi laiha, sei la halo buat ida. Governu la serve ita hotu mós la serve,” Xefe Governu husu tán.

Apela mós atu komesa hanoin, prepara an didi’ak, hosi parte finansas prepara an iha área finansas nian, hosi administrasaun nian prepara an didi’ak iha área administrasaun nian, hosi tékniku sira seluk mós prepara an didi’ak tanba iha mandatu ida-ne’e atu hahú desentralizasaun ho Governu lokál, hodi haree bá saúde, edukasaun, estrada, finansas, administrasaun no seluk tán.

Iha desentralizasaun ne’e, ema ida-idak hosi munisípiu ida-idak tenke prepara an didi’ak tanba ema hosi munisípiu Liquiça sei la simu ema ne’ebé mai hosi Covalima, nune’e mós hosi munsipiu seluk tán.

Primeiru Ministru husu atu halo reflesaun tanba funsionáriu sira mai atu kumpre, hotu-hotu hamutuk hodi hari kompromisu boot, hari Estadu direitu demokrátiku ne’ebé forte, hadi’a povu-nia moris, tanba povu mak manán funu hodi halo nasaun ne’e hetan ukun an la’ós komandante sira.

Xefe Governu subliña, povu mak deside, povu mak manán, nune’e povu mak merese atu hetan benefísiu hosi ukun an ne’e. (*Smnews)