PM Xanana Dezafia Igreja Hadia Kualidade Edukasaun

Smnewstl.com – Primeiru-Ministru Kay Rala Xanana Gusmão dezafia Igreja Katolika Timor-Leste atu investe makas hadia modelu hanorin ba kualidade edukasaun iha Universidade Católica Timorense (UCT) no eskola hotu hosi Igreja nian.

Xefe Governu Xanana informa asuntu ne’e durante partisipa selebrasaun misa selebrasaun Eskola Colégio Infante de Sagres Maliana- Bobonaro ba dala- 75 (1948-2023).

PM Xanana Gusmão husu Bispo Dioseze Dili, Maliana no Baucau atu tuur hamutuk ho padre no madre hodi deskute mudansa ba sistema edukasaun iha Universidade Católica Timorense (UCT) tenki diferente ho universidade privadu no institute superior sira.

“Ha’u ko’alia kona-ba universidade atu hasa’e kualidade ensinu iha Timor-Leste, maibe ha’u ba iha Balide iha Universidade Katoliku. Mais ha’u desisionado, tanba universidade sira, UNDIL, UNPAZ, UNTL sira hotu hanorin enfarmajen, maibé Universidade Katoliku mós hanorin fali enfarmajen. Universidade Katolika tenke hanorin filosofia atu sai exelente iha rai ida ne’e no hanorin lisaun sira uluk nia atu prepara sidadaun ba futuru nasaun no Igreja nian,” informa PM Xanana liu hosi deskursu iha Kolegio Infante Maliana- Bobonaro.

Igreja Katolika iha ninia misaun boot ida maka hasa’e kualidade edukasaun, dixiplina no moris nu’udar sarani Katolika tenke diferente ho universidade seluk. Tanba ne’e iha tinan 2008-2009, PM Xanana ko’alia ona atu harii Universidade Katolika de Exelensia no forma lideransa rai ida nian ba futuru.

“Ha’u husu favor ida amu sira, muda tok Universidade Katoliku Dili, sai Universidade de exelensia, hanorin filosofia, hanorin buat sira ne’ebé di’ak hodi atu kria nova jerasaun futuru ba rai ne’e,” PM husu.

Universidade Katoliku ne’e presiza kria edukasaun ida ne’ebe prepara sidaun, tanba Igreja Katolika iha papél istoriku ne’ebé bele kontinua ba future no papél Igreja atu dezempena ida-ne’e.

PM Xanana fó lembra iha tinan hirak ba kotuk nia ko’alia no Saudozu Bispo Baucau, Don Basilio do Nascimento atu harii Universidade Katolika ne’e iha Soibada ne’ebé sai fatin istóriku ba Igreja nian, maibé pedidu ne’e bispu maktoba la aseita hodi halo servisu barak la’o paradu.

Responde ba preokupasaun ne’e, Bispu Dioseze Maliana, Mgr. Noberto do Amaral rekoñese problema edukasaun iha Timor-Leste sei hasoru dezafiu oin-oin no parte Igreja rasik sei tuur hamutuk hodi hadia no aposta makas iha kualidade edukasaun.

“Ba preokupasaun ne’ebé Maun Boot Xanana tau, Universidade Katolika iha komplikasaun boot Igreja nia laran. Ne’e duni ha’u husu bele komprende ituan ba, tanba ida ne’e ami sei rezolve hela, depois sei haree didi’ak,” dehan Bispo.

Mgr. Noberto hatutan, Igreja Katolika sei halo regra mós ba eskola hotu Igreja Katolika nian mantein ninia dixiplina no regras hotu hodi motiva estudante sira bele aprende no estuda hodi sai ema ida edukativu tuir Igreja nia hanorin.

Tinan 75 Eskola Colégio Infante de Sagres Maliana

Entretantu Bispu Dioseze Maliana, Mgr. Noberto do Amaral no Reprezentante Vátikanu iha Timor-Leste, Núnsiu Apostóliku, Monseñor Marco Sprizzi informa selebrasaun tinan 75 Eskola Colégio Infante de Sagres Maliana nu’udar momentu istóriku no importante tebes ba sarani Bobonaro.

Durante tinan barak, Na’I Lulik Igreja Katolika sira ne’ebé hanorin iha kolegio ne’e konsege produs rekursu umanu Timoroan barak sai padre, madre no sai lider intelektuál hodi kontribui dezenvolvimentu edukasaun iha Timor-Leste.

“Ohin ita selebra aniversáriu ba dala 75 Colégio Infante de Sagres. Ita iha tinan 75 nia laran koléjiu ne’e produz ona ema rihun ba rihun agora sai lidera no sai amu lulik nomós madre iha rai ida-ne’e no ba Igreja. Buat sira ne’e hotu akontese tanba Mamorak nia grasa,” tenik Bispo. (Smnews)