Smnewstl.com —Primeiru Ministru (PM), Kay Rala Xanana Gusmão apresia ho inisiativa hosi grupu joven ne’ebé halibur-malu hodi estabelese sentru formasaun ida ho naran Grow With Purpose Center (GWPC), iha área Caicoli.
GWPC estabelesidu hodi oferese formasaun Lian Korea, Lian Japaun, Lian Portugés, Lian Inglés no Mutimédia.
Iha kinta (12/12/2024), ekipa ne’e marka audiénsia ho Primeiru-Ministru hodi aprezenta difikuldade tanba durante ne’e oferese formasaun ho voluntariamente, maibé ho vontade tomak hakarak ajuda joven timor-oan sira hodi bele asesu bá servisu iha rai-liur.
Iha loron ne’e kedan Xefe Governu interesadu no bá to’o iha fatin formasaun nian, hodi observa direta no haree kondisaun reál.
Iha terrenu Primeiru-Ministru deskobre katak, sira partisipa ho laran tomak, ho kbiit ne’ebé sira iha, la hetan apoiu ruma, hanorin ho voluntáriu no alunu sira mós kbiit la to’o atu selu.
Tanba ne’e, apela bá Sekretáriu Estadu Formasaun Profisionál no Empregu (SEFOPE) atu bele estabelese kooperasaun ho sentru formasaun ne’e iha futuru.
“Ha’u halo apelu bá SEFOPE atu mai to’o iha-ne’e hodi haree tanba sira partisipa iha atividade SEFOPE nian hodi prepara joven sira bele asesu servisu iha rai-liur, nune’e hetan osan oitoan bele haruka mai família hanesan mós parte ida dezenvolve Timor,” PM Xanana apela. (*/Smnews)
Komentariu