Smnewstl.com (Nova Iorke), 23 Setembru 2024—Primeiru-Minstru (PM), Kay Rala Xanana Gusmão agradese bá Organizasaun Mundiál Saúde (OMS) ne’ebé oferese medikamentus no rekursu umanu hodi apoia seitór saúde iha Timor-Leste (TL).

Xefe Governu hato’o asuntu ne’e bainhira atende konvite hosi Diretór-Jerál OMS, Dr Tedros Adhanom Ghebreyesus hodi hala’o vizita kortezia bá edifísiu OMS, iha Nova Iorke (23/09/2024).

Durante vizita, Xefe Governu ho Dr. Tedrosdiskute diskute dezafiu prinsipál sira saúde nian ne’ebé país sira enfrenta.

Tópiku seluk tán inkluí luta kontra doensa tropikál sira, eliminasaun malária no filarioze linfátika, no mós esforsu atu kombate kankru serviks, diabetes, hipertensaun no komérsiu ilísitu tabaku.

Sira mós enfatiza nesessidade atu bele aborda mál nutrisaun, hadi’a kualidade nutrisaun labarik sira nian no kombate doensa naun transmissíveis.

Parte rua mós reafirma importánsia parseria forte no kontínua entre OMS ho Timor-Leste ho nível hotu-hotu, subliña mós katak saúde tenke tau hanesan prioridade nu’udár misaun ida la’ós sai hanesan ajenda ida.

Durante reuniaun bilaterál, lider na’in-rua ne’ebé akompaña hosi Ministra Saúde, Elia dos Reis Amaral, no Reprezentante Permanente Timor-Leste ONU nian, Dionísio da Costa Babo Soares no hosi OMS nian, Reprezentate OMS bá Timor-Leste, Arvind Mathur, Diretora OMS bá Rejiaun Azia, Saima Wazed. (*/Smnews)

Lee nain: 971