Oan Kiak Nain-6 simu prezente uma mahon ida husi Prezidente Ramos-Horta Iha Daisua, Same-Manufahi

Smnewstl.com—Prezidente Repúblika, J. Ramos-Horta, liu husi Unidade Serbisu Solidariedade no Apoiu Sosiál, ofisiálmente entrega uma mahon ba oan kiak nain-6 iha Aldeia Riatu, Suku Daisua, Postu Same – Manufahi, hafoin tragedia família ne’ebé akontese iha 2023.

Família ho oan nain-6 ne’e hetan uma mahon refere atu hakmaan sira nia moris no sai husi situsaun difisil ida. Tuir kronolojia iha 2023, sira nia aman halo atentadu fíziku ne’ebé hasai tiha nia kaben (feen) nia vida, tanba problema família uma laran, dadaun ne’e sira nia aman sentensa hela iha Prizaun Becora. Iha tempu ne’e, labarik sira abandona hela ho sira nia avó feto ho kondisaun moris ne’ebé difisil loos.

Autoridade komunitária, Amorin da C. Sarmento, esplika katak hafoin akontesimentu trágiku ne’e, autoridade lokal buka meus atu bele tulun família ne’e ho oan kiak nain-6.

“Ita kontaktu organizasaun INDICA, ne’ebé oriénta ita atu halo proposta ba Prezidénsia Repúblika. Ekipa Gabinete Prezidénsia responde positivamente hodi harii Uma Mahon ba sira”. hateten Amorin.

Primeira pedra ba uma ne’e lança iha 29 Maiu 2025 no konstrusaun dura besik fulan lima, tanba liu husi dezafiu Klima udan maka’as, asesu estrada ne’ebé difisil. Uma ne’e remata iha 22 Outubru 2025, totál orsamentu ba konstrusaun uma refere hamutuk $ 14.511.00.

Assessor Prezidénsia Repúblika, Quintiliano Moniz, hateten; inisiativa ne’e baseia ba proposta husi autoridade lokal no INDICA.

“Ita entrega uma ne’e baseia ba proposta ofisiál mai husi suku Daisua no INDICA. Prezidente nia aprovasaun mos konfirma ita nia kompromisu hodi fo esperansa foun ba labarik sira ne’ebé moris iha situasaun difisil,” hateten Quintiliano.

Nia aumenta katak Prezidénsia sei koordena ho Ministériu Edukasaun atu garante labarik sira kontinua eskola, tanba edukasaun mak futuru ne’ebé sei lori sira sai ema útil ba nasaun.

Uma ne’e konsisté iha quarto rua, sala han-fatin, sala visita ida, dapur no haris fatin. Prezidénsia mos fornese mobiliáriu kompletu hanesan kama, kadeira, meja, televizaun, roupa no kios ki’ik ida hodi ajuda labarik sira bele sai autossufisiente. Apoiu mos inklui hahan necessidade bázika hanesan fos, mina, no manu tolu.

Alicia Clara Barros, nu’udar bin no responsavel principal ba alin nain-5, ho matabeen nakonu expresa nia sentidu gratidaun bo’ot ba Prezidente Ramos-Horta no nia ekipa:

“Agradese bo’ot ba abo Prezidente Ramos-Horta no ekipa sira hotu ne’ebé tulun ami hodi hetan uma mahon ne’e. Agora ami bele moris di’ak no alin sira bele kontinua eskola.”

Iha entrevista ne’ebé ekipa rekolla informasaun direta katak, oan feto nain-3 kontinua estudu, entretantu mane nain-3 seidauk fila fali ba eskola tanba trauma ne’ebé sira enfrenta.

Seremonia entrega ne’e hetan partisipasaun husi Gabinete Prezidénsia Repúblika Assessor Prezidente Repúblika, Quintiliano Moniz, hamutuk ho representante autoridade munisípal no autoridade lokál sira inklui husi organizasaun INDICA.

Prezidénsia reafirma nia kompromisu atu kontinua ajuda labarik sira iha edukasaun no protesaun sosiál, hodi nafatin halo koordenasaun ho Ministériu relevante sira.(*/Smnews)