Ministru Bendito ho PM Singapura Diskute Kooperasaun Ekonómika Komersiál

Smnewstl.com -Ministru Negósius Estranjeirus no Kooperasaun (MNEK), Bendito dos Santos Freitas iha kinta-feira foin lalais ne’e, hala’o vizita ofisiál dahuluk ba Singapura, hodi hametin liután relasaun diplomátika no kooperasaun bilateral entre nasaun rua.

Iha vizita ne’e, Ministru Bendito Freitas ne’ebé akompañadu husi Embaixadór Timor-Leste ba Singapura, Alex Tilman, hasoru malu mós Primeiru-Ministru Singapura, Lawrence Wong hamutuk ho Ministru Negósius Estranjeirus Singapura, Vivian Balakrishnan, hodi diskute kona-ba kooperasaun ekonómika, komersiál no investimentu iha rai-rua.

“MNE aumezmu tempu ho Primeiru-Ministru Singapura, Lawrence Wong, iha oportunidade previléjiu ida ami mós hasoru, ko’alia teb-tebes importante kooperasaun ekonómika, komersiál, investimentu iha Timor-Leste. Áreas prioritárias ne’ebé Timor bele dezenvolve maka indústria turízmu, peskas, agrikultura. Primeiru-Ministru rasik mós husu ita-nia abertura ka espansaun investimentu kona-ba manufatura nian, industrializasaun ne’ebé bele fó kampu traballu ba ita-nia joven sira, tanba ida-ne’e, haree ba setór ida-ne’ebé importante turízmu, ospitalidade, edukasaun no mós textile sira-ne’e ba konstrusaun sira-nian hotu,” informa Ministru Bendito.

Xefe Diplomasia ne’e relata, Xefe Governu Singapura, Lawrence Wong manifesta teb-tebes ninia apoiu jenuínu ba Timor-Leste, no atu halo promosaun investimentu barak liután, atu bele promove potensialidade ne’ebé iha, hodi trai investor sira ba investe iha Timor-Leste.

“Líder rua ne’e sujere, bele kontaktu ho ita-nia Vise PM ba Assuntus Ekonómikus, eselénsia Francisco Kalbuadi Lay, futuramente bele halo kooperasaun ruma ho mós apoiu ita-nia elementus Embaixada Timor-Leste iha Singapura, bele prepara par atu halo promosaun investimentu iha Singapura, liu-liu promove Timor-Leste nia potensialidade ba áreas ne’ebé bele tulun ba dezenvolvimentu ekonómiku ita-nia rai laran,”

Entretantu, enkontru bilateral ne’e entre Xefe Diplomasia Timor-Leste ho Sinapura ne’e, hala’o iha Ministériu Negósius Estranjeirus Singapura nian, no akompañadu husi Embaixadór Timor-Leste ba Singapura, Alex Tilman, Xefe Gabinete MNEK, Filomeno Rómulo Lay no seluk tan. (*/Smnews)