Ministra Dulce Lansa Ofisial Bolsa Kandidatu ba Manorin Faze Daruak Iha Manatuto

Smnewstl.com – Ministra Edukasaun, Dulce de Jesus Soares no Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos hamutuk ho Prezidente Komisaun Funsaun Públika Agostinho Letêncio de Deus, ofisialmente lansa bolsa kandidatu manorin ba faze daruak nian iha Munisípiu Manatutu, hafoin remata serimónia tomada de posse ba manorin sira iha ingresu espesiál no rejime karreira dosente.

Iha diskursu, Ministra Edukasaun Dulce de Jesus Soares hateten, bazeia ba Despaixu Ministeriál Nú. 19/2024, 13 de maiu ne’ebé publika ona iha jornál repúblika  determina abertura ba konkursu kona-ba bolsa kandidatu ba manorin/dosente ba faze daruak nian.

“Kritéria atu konkore nafatin hanesan uluk, ema ne’ebé mak atu konkore tenki ho idade husi 17 to’o 53 no nia tenki hatudu Kartaun Eleitorál ka Billete Identidade atu prova katak nia ema sidadaun Timór-Leste no aprenzenta mós setifikadu Baixarelatu, Lisensiatura, Mestradu no Doutoramentu ne’ebé mak legalizadu husi Ministériu Ensinu Superior, husi dokumentu sira ne’e mak kompletu nia bele ba tuir konkursu”, dehan Dulce

Governante ne’e hatutan, aban konkorrente sira iha territóriu tomak bele hakbesik-an ba servisu edukasaun iha Munisípiu hotu no lori dokumentu ba aprezenta.

Ba sira ne’ebé mak tempu liu ba tuir ona teste, maibé la pasa, sira-nia dokumentu iha nafatin, simplesmente bele ba konfirma fali no aplikasaun ba bolsa kandidatu ne’e sei loke durante loron sanulu (10). (*/Smnews)