Smnewstl.com – Ministériu Edukasaun konsidera igreja katólika nu’udar parseiru estratéjiku no promete atu nafatin servisu hamutuk hodi hadi’a kualidade seitor edukasaun.
Iha inaugurasun EBC Siklu 3⁰ Santa Terezinha Do Menino Jesus Biloko Lequidoe, Dulce de Jesus konsidera katak, hadi’a kualidade edukasaun hanesan foku prinsipal husi governu konstitusional da-sia.
“Hakarak husu ba ha’u nia oan sira, profesór sira, ba ita bo’ot sira hotu ne’ebé mak iha oportunidade atu atu eskola iha katólika, favór ida aproveita, tanba oras ne’e dadaun joven sira, labarik sira atu hasoru problema barak iha ita nia sosiedade, mezmu tau tiha eskola, maibé profesór sira la badinas atu ba hanorin no inan-aman balun mós la hanorin oan sira atu ba eskola i oan sira mós la uza oportuniade ne’e atu ba eskola”, dehan Ministra Edukasaun.
Ba governante ne’e, melloria kualidade ensinu ne’e responsabilidade governu, igreja no entidade hotu.
Iha missa abertura letiva, Dom Virgilio Cardeal do Carmo da Silva, SDB hateten, igreija ho estadu serví ema ida hanesan, tanba ne’e presiza investe maka’as, hodi ajuda dezenvolve seitor importante ne’e.
“Misa ohin ninian sai hanesan Misa agradesimentu, agradese ba di’ak ne’ebé ita simu, liu-liu ba grasa, tanba ofisiálmente eskola ida ne’e bensa no entrega ba ita bo’ot sira hodi hala’o atividade aprendizajen iha eskola refere”, dehan Arcebispo Metrolitano Dili.(SMNews)
Komentariu