MAE Hahú Mobilzia Ekipamentu, Povu Atauro Prepara Simu Sira Nia Administrador

Smnewstl.com 05-01-22 (Dili) — Ministériu Administrasaun Estatal (MAE), hahú mobiliza ekipamentu hanesan meza, komputador no seluk tan hodi instala iha Munisípiu foun Ataúro.

Ministru MAE, Miguel Perreira de Carvalho konfirma, dia 1 Janeiru 2022 ne’e, ofisialmente, postu administrativu Ataúro, nakfila ona bá Munisípiu Ataúro, tan ne’e, hein de’it par konsellu ministru nomea Administradór Munisípiu Ataúro.

MAE mós haruka ona funsionáriu balun iha ne’ebá, atu hahú instala ekipamentu hanesan komputadores no seluk tan.

“Ekipamentu sira mós ami hahú semana ida-ne’e transporta ona bá Ataúro, komputador, meza, kadeira sira-ne’e, par bainhira administradór Ataúro ne’e hetan nomeasaun, imediatamente sira bele utiliza ona fasilidade,” informa Ministru MAE, Miguel Perreira de Carvalho, iha Palásiu Governu, kuarta ne’e.

MAE mós haruka ona proposta bá Komisaun Funsaun Públika (KFP), atu nomea, Sekretáriu Munisípiu Ataúro no mós Diretór Munisipal Ataúro ho Xefe Departamentu sira.

Maibé, provizoriamente, governu sei utiliza edifísiu postu administrativu Ataúro nian hodi sai nu’udar edifísiu administrasaun hodi halo atendimentu bá komunidade sira, tanba edifísiu foun Administrasaun Munisípiu Ataúro nian, tinan ida-ne’e foin hahú nia konstrusaun.

“Sei iha sede administrasaun no mós iha fatin balun ké administrasaun Ataúro identifika ona, tanba iha tinan ida-ne’e ita sei halo konstrusaun bá edifísiu administrasaun munisipal Ataúro,” tenik nia.

Entretantu, daduak ne’e, MAE prepara ona kandidatu na’in tolu ne’ebé kompostu husi feto ida no mane nain rua atu aprezenta bá konsellu ministru atu nomea Administradór Munisípiu Ataúro.

Kritériu bá nomeasaun Administradór Munisípiu Ataúro ne’e, hanesan mós nomeasaun bá Administradór no Prezidente Autoridade Munisípiu 12 seluk, ne’ebé tenki liu husi deliberasaun konsellu ministru.

Entretantu, iha proposta Orsamentu Jerál Estadu (OJE) 2022, governu aloka bá Munisípiu Ataúro ho montante $2,508,100 aloka ba saláriu vensimentu $484,932, bens servisu $990,797, kapitál menór $728,100, kapitál dezenvolvimentu laiha no transferénsias públikas $304,271.(ant)