Horta Esklarese Rezultado Enkontru ho Marí Alkatiri

Smnewstl.com 28-04-2022 (Dili) – Maske iha palku politika lider sira se’e kotuk ba malu hodi hasai linguazen ne’ebe a’as ate to’o atake personalidade, maibe la sai hanesan obstaklu ba sira atu fila oin ba malu hodi lori rai ne’e ba oin.

Realidade Secretario Geral Partido Fretilin, Marí Alkatiri iha kampanha Prezidensial ne’ebe atake maka’as personalidade Prezidente Eleito Jose Ramos Horta, Kinta-feira ne’e simu hikas iha nia rezidensia Farol Dili.

Tuir informasaun ne’ebe Smnews asesu komfirma, Prezidente Eleito to’o iha rezidensia Marí Alkatiri iha oras tuku 4 lokoraik. Horta rekuinese, sorumutu ne’ebe halao hanesan parte ida husi komprimisiu eleitoral hodi bele hetan solusaun ba situasaun politika atual.

“Enkontru ho Secretario Geral Marí Alkatiri lao diak no buat barak mak ami koalia. “Klaru Hau mos sei hasoru Primeiro Ministro Taur Matan Ruak,”dehan Horta tuir informasaun ne’ebe mak Smnews asesu.

Tuir mai esklresimentu kumpletu husi Prezidenti Eleito, Jose Ramos kona ba nia sorumutu ho Secretario Geral, FRETILIN, Mari Alkatiri.

“Ohin hau ho Maun Mari hasoru malu, koalia horas ida, kona ba investidura Presidensial iha loron 19 Maio, selebrasaun 20 aniversariu, e koalia mos kona ba krisi ekonomika mundial ke iha impaktu makaas iha TL nia ekonomia e oinsa Líder Nasional sira atu fera ulun, halo estratejia ida URGENTE para hamenus pobu mukit nia terus.

Tuir hau nia knar nudar Presidente hau sei serbisu makaas para hameten dame, demokrasia liu hosi dialogu ho líder hotu2 no mos sosiedade civil e Igreja.

Ikus liu, hau husu Dr. Mari Alkatiri apoiu Deklarasaun Fraternidade Humana ne be Amu Papa Francisco no Grand Iman Muhammad Al-Tayyeb hosi Cairo maka Autor no Assina. Atan hau nia rekomendasaun ba Governu no Parlamentu Timor-Leste aprova resolusaun ke aprova Deklarasaun Fraternidade Humana tama kurrikulum eskolar. TL sei sai primeiru Nasaun iha Mundu ke simu Deklarasaun ne iha kurrikulum eskolar. Maun Mari simu dokumentu ho reaksaun positivu.

Dialogu sei kontinua ho Partidus hotu2 iha Parlamentu no sira ke seidauk iha fatin iha Parlamentu.

Antes ne’e, Prezidente eleito mos hasoru malu ona ho Komisaun Justisa e Paz liderado Pe. Julio Crispin nomos Diretor Programa Edukasaun Sidadania, Pe. Domingos Maubere no seluk.(Rio)