Kronologia Domingos do Rego Ne’ebe Mate Kauza Husi Asalta Malu Iha Fatima-Portugal

Smnewstl.com – Domingos do Rego, sidadaun ida husi Tulataqeu, Município Aileu lakon vida kauza husi asalta malu iha Fatima, Portugal iha loron Domingo kalan.

Dino Pereira, kolega husi matebean ba Smnews via telefone Watshapp haktuir, kazu ne’e akontese Domingo, loron 2 Junho 2024.

Nia hatutan, sira ho Matebean mak hamutuk ba hasae orasaun iha Fatima. To’o iha neba, derepenti hetan provokasaun no atake husi sidadaun balun ne’ebe diskumfia utiliza atributu arte marsiais hodi halo nain 3 sofre kanek no Domingos lakon vida.

“Ami matan foun, sira ida duni ami ne’e tuir informasaun hela kedas iha areadores Fatima nian. Sira mai ho sasan kroat kumpletu nune’e halo ami ida-idak halai fahe malu hafoin rona fali katak, nain 3 kanek no mate ne’e ami la hatene.

Depois de polisia halo fali investigasaun ba sira nain 3 kanek mak informa dehan, imi nia ema ida mate no dadaun ne’e iha hela Mortuario Tomar.

Komu kontaktu ba matebean nia numeru fora hela deit, entaun ami husu ajuda fali ba rai nain balun hodi ba komfirma iha Mortuario Tomar no los duni katak, Domingos do Rego mak mate.

Agora ami konsentra hamutuk hela atu ba Mortuario Tomar, iha sidade Coimbra ninian. Parte polisia komfirma hela mai ami hodi lori matebean nia pasaporte nune’e bele submete ba autopsia hodi hatene kauza husi nia mate.

Ami sente triste tamba lakon kolega diak ida, ami ba Fatima laos atu buka problema, maibe atu ba halo orasaun mak hetan asaltu.

Ami nia kolega nain 3 mak kanek, 1 alta ona no 2 seluk sei hetan hela tratamentu, enkuanto Domingos mak lakon vida,”haktuir Dino ho expresaun triste.

To’o informasaun ne’e fo sai, seidauk halo komfirmasaun ho parte relevantes li-liu Polisia Portuguesa no Embaixada TL iha Portugal.

Enkuanto Governo Timor-Leste liu husi Ministero dos Negocios Estranjeiru no Koperasaun, Bendito dos Santos Freitas ho lian maka’as orienta ona ba Embaixada Timor-Leste iha Portugal ho seriu hare kazu refere hodi fo solusaun. (Smnews)