KREDA NE’E LA NAHAS, SAI NAFATIN MASIN HODI HAME’ER SOSIEDADE

Iha fulan Outubru tinan 2021 nia rohan, kreda no emar sira neon kraik, lelir no lutu tan lakon ema di’ak ida, bibi atan di’ak ida, ne’ebe soin duni sai modelu, relijozu, jestor, manorin ida, Maktoban Dom Basilio do Nascimento, SDB, nia husik hela doutrina, lalaok moris no jestu murak atu ema sei banati no haktuir ba malu.

Aileu oan ne’e, sai domin na’in ne’ebe ukun sarani sira husi rai Baucau, Lospalos, Manatutu no Viquque. Nia hanesan bibi-atan sempre rona sarani sira, hakbesik sira no hamoris inisiativa sira ne’ebe mak hafutar realidade moris sarani sira, tan toman ona sarani sira hakarak, nia hela kleur iha sosiedade, maibe Maromak iha planu seluk, bolu nia ona, nia ba ona iha eternidade.

Tinan hirak nia laran, Na’i nia emar sira hein, se los mak sei sai bibi-atan ba sira, hodi lori sira ba du’ut matak, hodi sai nafatin masin hodi hame’er soseidade ida ne’e, tulun halos dalan kleuk sira hanesan saida mak Saun Joao Batista halo, molok simu Na’i Jesus, akonsella sarani sira atu fila ba dalan los, ikus, Santo Padre Papa Francisco fo fiar Maromak nia emar ida, padre Leandro Maria Alves hodi bali sarani sira husi rai Baucau, Lospalos, Viqueque no Manatutu.

Maktoba dom Basilio ba ona eternidade, iha Lalehan hateke hela, sai mahein ba dioseze Baucau, iha Saun José, Santo António, Saun João Bosco, Santo no martir sira seluk nia futar oin, atu missaun kreda nian, kontinua, haberan no habo’ot nafatin, ho Dom Leandro nia hahalok, lalaok no lideransa iha kreda no sosiedade.

Ermera oan ida ne’e, husi lisan Dasi Ubu no Leobote, mak sei bali hikas kreda Baucau, habo’ot liu tan, hameer liu tan, missaun kreda nian, atu la’os de’it luta ba vida espiritual, maibe ba mos formasaun sidadania, formasaun ba kuadrus, futuru lideransa sira, hodi serbi’i kreda no patria amada, Timor-Leste.

Hatene katak, rai lorosa’e konesidu ho Muturabu – halo rungu-ranga -, maibé fiar metin amo Leandro sei halo sira, sai Muturau – laran luak, hodi hadomi malu, bali malu, tuir prinsipiu Fraternidade Humana ne’ebe Timor-Leste opta.

Ofisializa ona iha loron Sexta-feira ne’e, katak, Dom Leandro Maria Alves mak Bispo Dioseze Baucau, iha Arcebispo Metropolitano Dom Virgilio do Carmo da Silva, Bispo Maliana Dom Norberto da Silva, Bispo husi rai amigo husi Kupang, alta entidade sira nia no sarani sira nia futar oin, jura hodi bali kreda to’o Na’i hakotu lia husi Kadunan Lalehan nian.

Na’i,.. emar sira laran ksolok, mata-ben kontente nia turuk tun ba rai, tan sente katak, tinan hirak nia laran, Dom Basilio husik misaun lulik ne’e ba eterenidade, ikus mai iha ida ne’ebe Santo Padre Papa hili hodi hatutan knaar nobre ba kreda no ba sosiedade.

Fuan tuku-tuku, emosioante ho novidade ne’e katak, Maromak tula tan ona, fiar ba emar ida, halo missaun ne’ebe hahu husi Na’i Jesus, Santo Pedro no Santo Paulo no Santo sira seluk ne’ebe, funda missaun, habo’ot to’o ohin loron.

Dom Leandro nia inan-aman mos ema simples, ho família sira seluk, la tahan matan-ben, waihira amo hakneak iha bispo sira seluk nia futar ona, halo promessa no simu tronu ukun nian, neon ksolok sira, hafutar ho matan-ben hodi tenik iha laran ”Maromak bolu Ermera oan ida, hodi bali kreda husi rai Lospalos, Baucau, Viqueqeu no Manatutu”.

La iha lia fuan, atu deskreve momentu emosionante ne’e, ho de’it lia hawelok no fo gloria ba Na’i iha leten a’as ba, tan nia laran luak mak, hili nia saseluk ida, hodi halo kna’ar ida ne’ebe ema hotu labele halo, nia hanesan fini musan ida, husi fini rihun ba rihun nia le’et, ne’ebe Na’i mak hili, ho nia kbi’it tomak.

Husi Na’i nia saseluk ne’e, emar sira hein atu nafatin hatutan bensaun husi Na’i iha leten a’as ba, haraik matak-malirin, rahun kmane’ek, atu kreda ida ne’e habo’o ba bei-beik, forma ema husi vida espiritual, sidadania, hodi serbi’i kreda, povu no rai doben Timor-Leste.

Gloria ba Maromak iha leten a’as ba, tan nia laran luak, sempre haraik ba nia emar sira, buat kmo’ok sira, ne’ebe ema admira, sente no goza, durante jornada moris iha rai ne’e nia leten, tan nia laran luak mos, sempre bali nia emar sira, maske hasoru momentu difisil no komplexu, maibe Na’i sempre proteje nia kriatura ne’e.

Ho missaun ne’e, mak Dom Leandro sei tuba-metin, atu Maromak nia emar sira ne’e, la la’o sala dalan no hirak ne’e sei alkansa no fiar hirak ne’ebe tula ba nian, hein sei la monu le’et de’it ba rai, no sei buat hotu sei konkretiza ho Maromak nia domin no grasa, hodi atentu maka’as ba epiritualidade, formasaun relijoza, sidadania no formasaun futuru kuadru no lider ba rai ida ne’e.

Na’in nia domin horik iha ita, tan nia sempre halo buat kmook ba nia emar sira.( Redesaun Smnews)