Kosovo Entrega Apresiasaun Award Ba Xanana Gusmao

Smnewstl.com 21-11-2021 (JAPAUN)- Mundu Internasionál kontinua rekoñese kapasidade Lider Istoriku, Kay Rala Xanana Gusmão ne’ebé susesu hamorin naran Timor-Leste ba mundu liu hosi sakrifisiu luta ho matenek ne’ebé hatudu durante luta tinan 24 too agora.

CAPTION: Reprezentante Kolegio (Dardania College) Arbenita Sopaj, PhD entrega apresiasaun Aword ba Xanana Gusmão akompaña hosi Embaixador Timor-Leste ba Japaun, Ilidio da Costa Ximenes. Imajen/Embaixada Japaun.

Iha vizita ba Japaun, Domingu (21/11/2021), Reprezentante Kolegio (Dardania College) hosi Nasaun Kosovo, Arbenita Sopaj,PhD entrega ofisilamente apresiasaun Award ba Xanana Gusmão akompaña hosi Embaixador Timor-Leste ba Japaun, Ilidio X. da Costa.

Reprezentante Kolegio (Dardania College) Arbenita Sopaj, PhD hato’o agradese ba Xanana no konsidera apresiasaun ne’e hanesan sinál agradesimentu ba esforsu Xanana nian hodi fó kontribuisaun fahe esperensia ba Kosovo kona-ba dame no rekonsilasaun (peace & reconciliation) iha Timor-Leste ne’ebé hato’o hosi deskursu virtuál iha loron 24 de Junho 2021.

“Apresiasaun award ne’e hosi Dardania College, Kosovo Tanba ninia (Xanana) kontribuisaun ba Peace no Reconciliation iha Timor Leste hodi fahe esperiensia ne’e ba Kosovo iha konferensia internationál ida ne’ebé hala’o iha loron 24 de Junho 2021,” dehan Reprezentante Dardania College, Arbenita ba Xanana.

Iha oportunidade ne’e, Arbenita konvida mós Eis Prezidente Repúblika Xanana atu vizita ba Kosovo hodi fahe esperensia kona-ba luta Timor-Leste kona-ba fronteira maritima ba sosiedade no estudante universidade sira.

Iha fatin hanesan, Xanana hato’o agradese ba Dardania College ne’ebé entrega apresiasaun award. Xanana konsidere esforsu ne’ebé nia halo hamutuk Timoroan atu lori Timor-Leste nu’udar nasaun ki’ik no kiak bele hetan rekoñesimentu hosi mundu hodi halo parte iha prosesu harii estadu hodi matan ba povu nia moris no hadia infraestrutura kontribui ba ekonomia ne’ebé di’ak.

Dadaun ne’e, mundu politiku rekoñese Xanana nia kapasidade, tanba susesu lori Timor ba ukun aan, kria rekonsiliasaun ho nasaun viziñu hanesan Indonézia no Austrália hodi rezolve disputa fronteira tasi no rai ho dalan pasifiku.(rio)