Komunidade Betó Triste Fahe Malu Ho Grupu Arte Moris

Smnewstl.com 02-12-2021 (Dili) – Komunidade Aldeia Betó Leste Suku Madohi Postu Administrativu Dom Aleixo Munisípiu Dili sente triste bainhira fahe malu ho grupu Arte Moris.

Grupu Arte Moris durante ne’e hala’o atividade arte ga pintura iha sira-nia fatin ne’ebé lokaliza iha Aldeia Betó Leste Suku Madohi Postu Administrativu Dom Aleixo Munisípiu Dili kuaze tinan 20 ona.

Durante hala’o atividade arte ka pintura iha área refere, konsege prodús ona joven Timoroan kreativu lubuk ida liu-liu iha área arte hanesan pintura no seluk tan.

Maibé finalmente, iha Kuarta-Feira (01-12-21), sira tenki simu konsekuénsia, tanba governu liu husi orientasaun Sekretáriu Estadu Terras Propriedades ne’ebé laiha fuan no sentimentu umanismu, haruka sira-nia liman ain Polísia Nasionál Timor-Leste (PNTL) ho guarda jestaun merkadu Munisípiu Dili, obrigatoriamente hasai sasán arte no abandona hela iha loron laran.

Arte ne’ebé grupu Arte Moris sira pinta ho korres oin-oin inklui mós líder istóriku sira-nia imazen hahú husi Prezidente Nicolau Lobato no mós líder sira seluk, tenki abandona hela iha li’ur, tanba seidauk iha fatin dignu bá sira atu akomoda didi’ak sasán arte sira-ne’e.

Tanba ne’e, Porta-voz Komunidade Arte Moris, Roberto Gusmão hatete, durante tinan 20 nia laran moris hamutuk ho grupu Arte Moris, sira iha kooperasaun ne’ebé di’ak, maske ida-idak hala’o nia atividade.Nu’udar umanu, Roberto sente triste bainhira haree atuasaun Polísia nian bá sasán arte sira iha Arte Moris.

Roberto Gusmão dehan, hanesan sidadaun sempre submete bá lei ne’ebé vigora, maibé presiza halo tratamentu ne’ebé dignu, tanba Arte Moris mós iha papel importante tebes iha prosesu konstrusaun estadu no mós prosesu dezenvolvimentu nasionál.

Tanba durante ne’e, grupu Arte Moris konsege fahe sira-nia esperiénsia lubuk bá juventude barak ne’ebé laiha kapasidade no talentu, ikus mai bele iha kapasidade ho talentu.

“Ita triste, maibé ida-ne’e desizaun lei mak haruka, loloos ne’e governu ka estadu, tanba sira-ne’e ema ida-ne’ebé kria atividade talentu ida bá juventude sira ne’ebé laiha kapasidade iha kapasidade, laiha talentu atu hetan talentu hodi dezenvolve kontribui bá ita-nia nasaun. Ne’eduni estadu labele abandona ema sira hanesan ne’e, ema sira-ne’e ita bolu karik, buka rasik, la’ós tane liman bá ema seluk,” dehan Roberto Gusmão iha Betó Arte Moris, Kinta-feira ne’e.

Porta-voz ne’e husu ba estadu no governu atu labele abandona Grupu Arte Moris sira, maibé, presiza kria fatin ne’ebé dignu bá sira, nune’e sira kontinua dezenvolve aan no mós fahe esperiénsia bá joven sira atu sai ema ne’ebé kreativu iha área arte nian.

Sorin seluk, Prezidente Asosiasaun Arte Moris, Iliwato Dana Bere ho matan ween turuk espressa sentimentu triste katak, karik sira mak sai duni husi fatin ne’e, maka sei lakon belun di’ak sira ne’ebé durante ne’e sira moris no aprende hamutuk.

“Todan oituan ami sei laiha tempu para atu husik malu ho didi’ak, maibé ami orgullu no agradese durante ami ejiste sira haree di’ak, ami joven sira mai aprende,” dehan Iliwato ho matan ween.

Nia haktuir tan, durante ne’e ema hotu dehan, Betó nu’udar bairu rísku bá konflitu, maibé, eventu hotu ne’ebé Arte Moris halo sempre la’o ho di’ak, no laiha barullu ruma.

“Ema hotu dehan, Betó ne’e Bairu la di’ak, mais ami-nia eventu hotu ne’e nunka mais iha barullu, sira apresia ami, balun moris mai boot sai ami-nia alin sira halimar hamutuk, ami sei lakon belun barak,” nia konta tan.(ant)