Lori Naran Polísia Hodi Asalta Ema, PSIK Kaptura GM Iha Tasitolu

Smnewtl.com 06-12-2021 (Dili) – Polísia Sientífika Investigasaun Kriminál (PSIK) suspeita segunda-feira ne’e sidadaun ida ho inisiál GM, tanba komete iha krime roubu no uzurpasaun bá funsaun.

Iha loron, 1 Dezembru foin lalais ne’e, PSIK liu husi servisu pikete simu keixa husi sidadaun ida ho inisiál MA katak, nia hetan asaltu husi suspeitu ho inisiál GM ne’ebé uza autoridade polisiál nia naran, nune’e konsege hadau vítima MA ninia sasán sira.

Hafoin simu keixa husi vítima AM, PSIK hamutuk ho ofisiál IT sira halo kedas koordenasaun hamutuk hodi tenta buka no lokaliza paradeiru autór ninian. Iha fali loron tuir mai, 02 Dezembru, konsege duni identifika autór ka suspeitu GM, no halo detensaun ho fragante de lito ba autór, iha área Tasitolu hodi lori bá detein iha sela detensaun PSIK Ministériu Justisa hodi oras 72 hodi aprezenta bá primeiru interrogatóriu.

Portavór PSIK, Octávio da Costa Araújo hateten, PSIK asegura ona objetu krime sira ne’ebé suspeitu uza hodi halo asaun hasoru vítima hanesan motor, osan $ 1000-resin, inklui mós telemóvel ne’ebé pertense bá vítima AM nian ne’eb’e suspeita hasau.

“Ho objetu do krime iha hela vítima nia liman, entaun, iha momentu ne’e, ita halo kedas detensaun flagante de lito bá iha suspeitu. Dadaun ne’e, suspeitu detein hela iha sala detensaun durante 72 oras, hodi komunika ho Prokuradór do turnu, hodi submete bá iha primeiru interrogatóriu judisiál,” dehan Porta-voz PSIK, Octavio da Costa Araújo, liuhosi konferensia imprénsa, iha sala auditóriu PSIK Segunda ne’e.

Maske, bazeia bá keixa ne’ebé vítima hato’o bá PSIK katak, diskonia suspeitu uza armas Polísia hanesan kilat no seluk hodi halo ameasas, maibé, bainhira PSIK kaptura, la identifika armas ruma husi suspeitu GM.

“Iha momentu detensaun, la konsege deteta armas. Maibe iha konversa autór ninian ho vitima, inklui autoridade judisial, antes detensaun, nia deklara katak dehan, nia membru polisia, e nia armas. Entaun, iha kazu ida ne’e, ita atu rezumu suspeitu ne’e, involve ka komete Roubo, inklui usurpação de funções,” haktuie Octávio.(ant)