Ramos-Horta:Revogasaun ba lei pesaun Vitalisia”La Presiza Lori B Tribunal Rekursu

SMnewstl.com- Palásiu Prezidensiál Nicolau Lobato, 26 Setembru 2025

Prezidente Repúblika J. Ramos-Horta hateten revogasaun ba Lei Pensaun Mensál Vitalísia la presiza lori ba Tribunal Rekursu, tanba tuir análize legál, laiha problema konstitusionál.

Deklarasaun ne’e hato’o hafoin enkontru ho estudante Universitáriu Timor-Leste (EUTL) ne’ebé manifesta kontra lei ne’ebé fó direitu subsidiu pensaun Mensál vitalísia. Prezidente apresia estudante sira nia komportamentu ho maturidade polítika, tanba manifestasaun ne’e la ho violénsia.

Prezidente reafirma prioridade ba edukasaun, saúde no setór produtivu sira seluk. Ninia prekupasaun mos kona-ba situasaun profesor sira nia dedikasaun serbisu to’o tinan barak, maibé hetan vensimentu ki’ik, kompara ho benefísiariu ba pensaun vitalísia ba membru Parlamentu ka Governu sira ne’ebé serve deit ba tinan 5.

“Buat ida ha’u hakfodak ho pensaun Vitalisia mak, Deputadu ida ka membru governu ida ninia mandatu tinan 5 deit simu Pensaun vitalisia maibé mestre-oan ida iha foho be eduka ita nia oan sira, serbisu dedikasaun hanorin to’o tinan 30-40, hetan vensimentu mak $200-$300 no depois be sira be hamoos lixu iha Hospital ne’e hotu. Ne’e mak ita haree la justu duni, Joven estudante sira iha razaun ha’u agradese ba sira nia intervensaun”. Hateten Prezidente Ramos-Horta.

Prezidente mos hato’o nia gratidaun ba Membru Parlamentu sira no mos ba IV Governu Konstituisional, liu-liu ba Maun bo’ot Xanana tanba desde 2007  nia la konkorda kedas Pensaun Vitalísia. Portantu ita muda ida ne’e konforme lei be aprova ona husi Parlamentu ne’e.

Prezidente husu Parlamentu no Governu atu konsidera nafatin estudante sira nia ejijénsia iha diskusaun Orsamentu Jeral Estadu 2026.

Nia konfirma katak ohin kalan nia sei hare didiak hamutuk ho presidénsia nia jurista sira sei halo revisaun finál no depois prezidente halo Promulga lei ne’e iha sábadu ne’e, Domingu/Segunda. Remata// (SMnews)