SMNewstl.com (Dili)-Polísia Nasionál Timor-Leste (PNTL) liuhusi Komandu Munisípiu Dili kaptura ona suspeitu tolu (3), ne’ebe halo agresaun fizika hasoru vitima Leandro Xena iha estrada publiku Bebora Dili.
Ba SMNews via telefone, Leandro komfirma katak, hetan ona kuinesimentu ligado ho kapturasaun ba suspeitu tolu ne’ebe asalta nia iha Kinta-feira, mazimenus tuku nen lokoraik oras Timor Leste iha Bebora Dili.
Hanesan vitima, nia parte ejize atu prosesa kazu ne’e tuir dalan legal nune’e suspeitu sira bele responsabiliza ba aktu krime.
“Hau hakarak lori prosu ne’e ba oin, tamba hanesan vitima. Hau laiha relasaun ho sira, maibe sira tuir hau desde semana rua antes ona”.
“Dahuluk sira ba iha hau nia edifisio Ministerio Turismo, maibe momentu ne’eba hase malu deit no hau mak husu karik buat ruma bele foti hau nia numeru kontaku e depois maka liga para ita koalia. Horseik maka sira mai asalta hau hodi rezulta kanek iha ibun, hirus matan no liman sorin parte los,”nia relata.
Xena hatutan, depois halo tia agresaun vizika, suspeitu sira mos hakilar tuir hodi akuza dehan “o tolok Mari Alkatiri no Presidente Republika”. Hau hatan fila fali hodi dehan, horibainhira mak hau ba hasoru Mari Alkatiri ho PR hodi tolok, sira la hatan hodi fila kotuk deit,”nia Sublinha
Tuir informasaun ne’ebe SMNews asesu mos komfirma, sspeitu tolu ho inisiál R kapturado iha área Bekora, A ho R deside entrega-an rasik ba iha Komandu Munisípiu Dili.
Suspeitu sira sei submete ba identifikasaun inklui prosesu inkeritu molok aprezenta ba Ministerio Publiku.
Kazu ne’e rasik akontese iha Estrada Publiku Bebora Dili lokalizado kedas iha vitima Leandro nia uma oin, nebe husi suspeitu tolu ne’e, rua tuku no tebe, enkuanto ida seluk koko lori Besi ne’ebe fui ho Simenti maka baku.
Enkuanto vitima Leandro Xena rasik mos aprezenta ona nia keixa kumpletu ho rezultado visum husi mediku.(rio)
Komentariu